کراچی : مصطفیٰ عامر قتل کیس میں ڈی ایس پی احسن ذوالفقار کی شہادت کے بعد ملزم ارمغان کے خلاف قتل کی دفعات شامل کرنے کی استدعا کردی گئی۔
تفصیلات کے مطابق مصطفیٰ عامر قتل کیس میں بڑی قانونی پیش رفت سامنے آئی ہے، دورانِ علاج ڈی ایس پی احسن ذوالفقار کی شہادت کے بعد پولیس نے مقدمے میں قتل کی دفعات شامل کرنے کی استدعا کر دی۔
مرکزی ملزم ارمغان نے کیس دوسری عدالت منتقل کرنے کے لیے درخواست دائر کر دی ہے۔
پولیس نے انسدادِ دہشت گردی کی عدالت میں زخمی ڈی ایس پی احسن ذوالفقار کے جاں بحق ہونے کی باقاعدہ رپورٹ جمع کرا دی ہے۔
رپورٹ میں کہا گیا کہ 8 فروری 2025 کو جب پولیس ٹیم ملزم ارمغان کی گرفتاری کے لیے چھاپہ مارنے پہنچی تو ملزم نے فائرنگ کر دی، ملزم کی فائرنگ سے ڈی ایس پی احسن ذوالفقار شدید زخمی ہوئے تھے، جو زخموں کی تاب نہ لاتے ہوئے اسپتال میں دورانِ علاج شہید ہو گئے۔
پولیس نے استدعا کی ہے کہ مقدمے میں قتل کی دفعہ شامل کی جائے اور اب ملزم ارمغان پر ترمیمی فردِ جرم عائد کی جائے۔
دوسری جانب، ملزم ارمغان نے انسدادِ دہشت گردی کی عدالت نمبر 7 سے کیس کسی دوسری عدالت میں منتقل کرنے کے لیے منتظم عدالت میں درخواست دائر کر دی ہے۔ ملزم کی جانب سے موقف اختیار کیا گیا ہے کہ اس کا مقدمہ کسی دوسری اے ٹی سی عدالت میں بھیجا جائے۔
انسدادِ دہشت گردی کی عدالت نے فریقین کے دلائل اور پولیس رپورٹ کا جائزہ لینے کے بعد کیس کی مزید سماعت 20 اپریل تک ملتوی کر دی ہے۔
آئندہ سماعت پر ملزم کی منتقلی کی درخواست اور قتل کی دفعات شامل کرنے کے حوالے سے اہم فیصلے متوقع ہیں۔
