فیلڈ مارشل امن کیلئے پھر متحرک

اسلام آباد، تہران ، نیو یارک ( نیوز ایجنسیاں) فیلڈ مارشل عاصم منیر پھر امن کیلئے متحرک ہوگئے ، انہوں نے ایرانی وزیرخارجہ سے حوثیوں کے سعودی عرب پر حملے، خطے کی تازہ صورتحال، بڑھتی ہوئی کشیدگی اور علاقائی سلامتی کو درپیش خطرات پر تبادلہ خیال کیا جبکہ حوثی حملوں سے متعلق اقوام متحدہ کی سلامتی کونسل کے ہنگامی اجلاس میں پاکستان نے سعودی عرب کی مکمل حمایت کا اعادہ کیا۔ فیلڈ مارشل سید عاصم منیر اور ایرانی وزیر خارجہ عباس عراقچی کے درمیان ٹیلیفون پر رابطہ ہوا، جس میں حوثیوں کے سعودی عرب پر حملے، خطے کی تازہ صورتحال، بڑھتی ہوئی کشیدگی اور علاقائی سلامتی کو درپیش خطرات پر تبادلہ خیال کیا گیا۔ایرانی حکومت کے سوشل میڈیا اکائونٹ ایکس سے جاری ہونے والے بیان میں کہا گیا کہ دونوں رہنمائوں نے بڑھتی ہوئی کشیدگی، علاقائی سلامتی کو درپیش خطرات اور ان کے علاقائی امن و استحکام پر ممکنہ اثرات کے حوالے سے تبادلہ خیال کیا۔برطانوی خبررساںادارے کے مطابق پاکستانی سیکیورٹی حکام نے بتایا کہ دونوں رہنمائوں نے تہران اور امریکا کے درمیان جاری تنازع کو کم کرنے اور سفارتی کوششوں کی بحالی کے طریقوں پر بھی گفتگو کی۔دونوں جانب سے خطے میں جاری کشیدگی اور بڑھتی ہوئی عدم تحفظ کی صورتحال پر اپنے موقف کا تبادلہ کیا گیا۔ ملاقات کے دوران کشیدگی میں اضافے کے علاقائی امن اور استحکام پر پڑنے والے اثرات کا بھی جائزہ لیا گیا۔دونوں فریقوں نے موجودہ صورتحال کے تناظر میں علاقائی ممالک کے درمیان چوکس رہنے اور باہمی رابطے و تعاون بڑھانے کی ضرورت پر زور دیا۔اس کے ساتھ ساتھ خطے میں دیرپا امن اور سلامتی کے قیام کیلئے مشترکہ صلاحیتوں اور وسائل کو بروئے کار لانے پر بھی زور دیا گیا۔ ٹیلیفونک رابطے کے حوالے سے فوری طور پر مزید تفصیلات جاری نہیں کی گئیں۔ دریں اثناء اقوام متحدہ میں پاکستان کے مستقل مندوب عاصم افتخار نے کہا ہے کہ حوثی حملے سعودی عرب کی خودمختاری اور علاقائی سالمیت کی کھلی خلاف ورزی ہیں، پاکستان سعودی عرب کی سلامتی، خودمختاری، علاقائی سالمیت کی مکمل حمایت کرتا ہے،خطے اور اس سے باہر امن و سلامتی کے وسیع تر مقاصد کے حصول کے لیے اپنی کوششیں جاری رکھیں گے۔ اقوام متحدہ کی سلامتی کونسل کا سعودی عرب پر حوثی حملے کے حوالے سے ہنگامی اجلاس ہوا جس میں پاکستان نے سعودی عرب کی سلامتی، خودمختاری، علاقائی سالمیت کی مکمل حمایت کی اور کہا کہ سعودی عرب کو اپنے شہریوں، رہائشیوں اور قومی اثاثوں کے تحفظ کے لیے ضروری اقدامات کا جائز حق حاصل ہے۔پاکستان کے مستقل مندوب عاصم افتخار نے کہا ہے کہ یمن کی صورتحال کو انتہائی تشویشناک اور خطرناک مرحلے میں داخل ہو چکی ہے، یمن کی صورتحال پر گہری تشویش ہے، بحیرہ احمر میں تجارتی جہازوں پر حوثی حملے باعث تشویش ہیں۔عاصم افتخار نے کہا کہ یمن میں مزید کشیدگی روکنے اور سفارت کاری کے لئے گنجائش برقرار رکھنا ضروری ہے، اقوام متحدہ کی سرپرستی میں یمنی قیادت پر مبنی سیاسی عمل کی حمایت کرتے ہیں۔پاکستان کے اقوام متحدہ میں مستقل مندوب نے کہا کہ ہم سلامتی کونسل میں جاری اختلافات اور اس کے نتیجے میں پیدا ہونے والے تعطل پر بدستور تشویش رکھتے ہیں، جس نے کونسل کے ذیلی اداروں کے کام کو بھی متاثر کیا ہے۔انہوں نے کہا کہ ہمیں امید ہے کہ رکن ممالک اتحاد کا مظاہرہ کریں گے، اپنی ذمہ داریوں کو محسوس کریں گے اور اس چیلنج پر قابو پانے کیلئے مشترکہ کوششیں کرتے ہوئے بین الاقوامی امن و سلامتی کے تحفظ کیلئے ایک مشترکہ مقصد پر متفق ہوں گے۔سفیرِ پاکستان نے کہا کہ ہم خطے اور اس سے باہر امن و سلامتی کے وسیع تر مقاصد کے حصول کے لیے اپنی کوششیں جاری رکھیں گے۔یاد رہے کہ سلامتی کونسل کا ہنگامی اجلاس یمن کی تازہ صورتحال اور خطے میں بڑھتی ہوئی کشیدگی کے تناظر میں طلب کیا گیا تھا، جہاں پاکستان نے سعودی عرب کے حقِ دفاع اور علاقائی سلامتی کے حوالے سے اپنے واضح موقف کا اعادہ کیا۔
فیلڈ مارشل