اسلام آباد (18 اپریل 2026): ملکی دارالحکومت میں مضرِ صحت جوس پینے سے تین افراد کی موت کی خبر پر ضلعی انتظامیہ نے نوٹس لے لیا۔
ضلعی انتظامیہ کے ترجمان نے بتایا کہ سوشل میڈیا پر اسلام آباد میں جوس پینے سے تین افراد کی موت کی خبر پر نوٹس لیا گیا، تاہم اسپتال رپورٹ کے مطابق اموات جوس پینے سے نہیں ہوئیں۔
ترجمان نے بتایا کہ متاثرہ فیملی کو جوس کی خریداری سے متعلق علم نہیں، فوڈ اتھارٹی نے متاثرہ فیملی کے علاقے میں تمام جوس کارنرز کی انسپکشن کی، اس دوران مضرِ صحت جوس نہیں ملا۔
ضلعی انتظامیہ نے مزید بتایا کہ تحقیقات میں جوس پینے سے جاں بحق ہونے کے شواہد نہیں ملے۔
واضح رہے کہ سوشل میڈیا پر گردش کرنے والی خبروں میں دعویٰ کیا گیا تھا کہ اسلام آباد میں مبینہ طور پر جوس پینے کے بعد گزشتہ 72 گھنٹوں کے دوران تین افراد کی موت ہوگئی۔
خبروں کے مطابق مرنے والوں کی عمریں 34، 19 اور 22 سال بتائی گئی، تینوں کو مبینہ طور پر ان کی حالت بگڑنے کے فوراً بعد ایک سرکاری اسپتال منتقل کیا گیا۔
