کراچی میں جمع پانی میں ڈوب کرسالہ لڑکا جاں بحق12

کراچی (این این آئی) حسن سکوائر، سوک سنٹر کے قریب زیر تعمیر عمارت کے باہر جمع گہرے پانی میں ڈوب کر 12 سالہ لڑکا جاں بحق ہوگیا، ریسکیو اہلکاروں نے تقریباً آدھے گھنٹے کی جدوجہد کے بعد بچے کی لاش پانی سے نکال لی۔ ریسکیو حکام کے مطابق سوک سنٹر اور ٹاؤن آفس کے درمیان واقع زیر تعمیر پلاٹ میں تین دوست پانی میں نہا رہے تھے، اس دوران 12 سالہ ایلیا پتھر سے چوٹ لگنے کے باعث پانی میں ڈوب گیا جبکہ اس کے دو دوست اپنی مدد آپ کے تحت پانی سے باہر نکل آئے۔ ریسکیو حکام کے مطابق واقعے کی اطلاع رات تقریباً 11 بج کر 12 منٹ پر ریسکیو 1122 کو دی گئی، جس پر فرسٹ ریسپانس ٹیم فوری طور پر موقع پر پہنچی اور غوطہ خوروں کی مدد سے کارروائی شروع کی۔ تقریباً 30 منٹ کی جدوجہد کے بعد بچے کی لاش پانی سے نکال لی گئی۔ ریسکیو اہلکاروں کے مطابق زیر تعمیر پلاٹ میں جمع پانی کی گہرائی 30 فٹ سے زائد ہونے کا امکان ہے جس کے باعث امدادی کارروائی میں مشکلات کا سامنا کرنا پڑا۔ جاں بحق ہونے والے بچے کی شناخت 12 سالہ ایلیا ولد انتھونی کے نام سے ہوئی ہے، جو عیسیٰ نگری کا رہائشی تھا۔ ریسکیو ٹیم نے لاش ضابطے کی کارروائی کے لیے ہسپتال منتقل کی، بعدازاں قانونی کارروائی مکمل ہونے پر لاش ورثا کے حوالے کردی گئی۔ ذرائع کے مطابق بچے کے دونوں دوست واقعے کے فوری بعد خوف کے باعث کسی کو اطلاع نہ دے سکے، بعد میں انہوں نے اہلخانہ کو واقعے سے آگاہ کیا، جس کے بعد ریسکیو 1122 کو اطلاع دی گئی۔ واقعے کے بعد علاقہ مکینوں نے زیر تعمیر پلاٹ میں جمع پانی اور حفاظتی انتظامات نہ ہونے پر تشویش کا اظہار کیا ہے۔