الیکشن ٹربیونل نے رکن گلگت بلتستان اسمبلی سید امام مالک کی رکنیت معطل کردی

گلگت (آئی این پی )الیکشن ٹریبونل نے رکن گلگت بلتستان اسمبلی سید امام مالک کی اسمبلی رکنیت معطل کرنے کا حکم دیتے ہوئے 5روزکے اندر تمام پوسٹل بیلٹ پیپرز کی دوبارہ گنتی کی ہدایت کر دی۔ الیکشن ٹریبونل کی جانب سے سید امام مالک کی بنیادی رکنیت معطلی کا باقاعدہ اعلان کرتے ہوئے آرڈر 85 اور سیکشن 95 کے تحت پوسٹل بیلٹس کی گنتی کا حکم جاری کردیا گیا۔امام مالک نے گلگت بلتستان الیکشن میں جی بی 16 دیامر سے بطور آزاد امیدوار حصہ لیا، کامیابی کے بعدوہ آئی پی پی میں شامل ہو گئے تھے۔چیف الیکشن کمشنر گلگت بلتستان نے آئی پی پی سیکریٹری جنرل میاں خالد محمود کی درخواست منظور کرتے ہوئے امام مالک کی آئی پی پی میں شمولیت کاباضابطہ نوٹیفکیشن جاری کیا۔جی بی اے 16 دیامر 2 سے آزاد حیثیت میں الیکشن میں حصہ لینے والے سید امام مالک نے اپنے مدمقابل عطا اللہ کے مقابلے میں 24 ووٹوں کی معمولی برتری حاصل کی تھی۔ریٹرننگ آفیسر کی جانب سے فارم 49 جاری کرتے وقت پوسٹل بیلٹ پیپرز کی گنتی نہیں کی گئی، جبکہ فارم 47 کی بنیاد پر پروویژنل فارم 49 جاری کر دیا گیا۔پاکستان پیپلز پارٹی کے امیدوار عطا اللہ نے ریٹرننگ آفیسر کی جانب سے جاری کردہ پروویژنل فارم 49 کو الیکشن ٹریبونل گلگت بلتستان میں چیلنج کر دیا تھا۔