قائد اعظم محمد علی جناح کی قیادت، عزم ‘ اصول پاکستان کی بنیاد : عبدالعلیم خان

اسلا م آباد(آئی این پی ) وفاقی وزیر مواصلات اور صدر استحکام پاکستان پارٹی عبدالعلیم خان نے کہا ہے کہ قائداعظم کے اصول پاکستان کی بنیاد اورباقی ملک کی ترقی، استحکام اور خوشحالی کی ضمانت ہیں۔ قائداعظم محمد علی جناح کے یومِ وفات پر اپنے پیغام میں علیم خان نے کہا کہ قائداعظم کی قیادت، عزم اور اصول پاکستان کی بنیاد ہیں۔ قائداعظم نے اتحاد، ایمان اور نظم و ضبط کے اصولوں سے قوم کو نئی سمت دی، ان کی انتھک کاوشیں ہمارے لیے مشعلِ راہ ہیں۔ عبدالعلیم خان کا کہنا ہے کہ بانی پاکستان کی خدمات اور جدوجہد قوم کبھی فراموش نہیں کرسکتی، قائداعظم کے اصول ملک کی مضبوطی، خوشحالی اور خودمختار ریاست کی ضمانت ہیں۔ آج قائداعظم کی عظیم جدوجہد اور لازوال خدمات کو خراجِ عقیدت پیش کرنے کا دن ہے۔وفاقی وزیر مواصلات نے کہا کہ ملک کو مضبوط اور مستحکم بنانا قائداعظم کے خواب کی تکمیل کی جانب اہم قدم ہے، قائداعظم کے اصولوں پر کاربند ہوکر ہی پاکستان کو ترقی یافتہ ملک بنایا جاسکتا ہے۔ ان کے دیانت، امانت اور اصول پسندی کے شعار قوم کیلئے روشن مثال ہیں، پاکستان کی ترقی، استحکام اور خوشحالی کے لئے اتحاد اور نظم و ضبط کو اپنانا ہوگا۔