ملک کے مخصوص اضلاع میں انسداد پولیو مہم 21ستمبر سے شروع ہوگی

اسلام آباد (این این آئی) پنجاب، سندھ، اسلام آباد، بلوچستان، خیبر پختونخوا اور گلگت بلتستان میں انسداد پولیو مہم21 ستمبر سے شروع ہوگی۔ انسداد پولیو پروگرام کے مطابق ملک کے 115 مخصوص اضلاع میں انسداد پولیو کی ذیلی قومی مہم27 ستمبر تک جاری رہیگی۔ مہم کے دوران 3 کروڑ10 لاکھ سے زائد بچوں کو پولیو سے بچائو کے قطرے پلائے جائیں گے۔ انسداد پولیو کی مہم میں خدمات انجام دینے والے ورکرز کے یومیہ معاوضے میں28 فیصد اضافہ کر دیا گیا ہے۔ مذکورہ اضافہ ان ورکرز کی انتھک محنت اور خدمات کی بدولت کیا گیا ہے۔ ملک میں پولیو کیسز کی تعداد میں99 اعشاریہ8 فیصد کمی واقع ہوئی ہے۔ انسداد پولیو پروگرام کے مطابق ملک میں پولیو کیسز کی تعداد 1990 کے اوائل میں اندازا 20 ہزار سے کم ہو کر 2025 میں31 اور 2026 میں 3 کیسز تک محدود ہوگئی ہے۔