سرکاری ہسپتالوں کی پارکنگز میں مالی بے ضابطگیاں ٹھیکیدار وصولی جیبوں میں ڈالنے لگے

لاہور (مہران اجمل خان سے) سرکاری ہسپتالوں کی پارکنگز میں مبینہ مالی بے ضابطگیاں، متعدد سرکاری ہسپتالوں کے پارکنگ ٹھیکیدار روزانہ کی بنیاد پر کی جانے والی وصولی جیبوں میں ڈالنے لگے ، شہری نے 50کروڑ روپے کی تحقیقات کا مطالبہ کردیا۔  تفصیلات کے مطابق پنجاب کے متعدد سرکاری ہسپتالوں کی پارکنگز میں مبینہ مالی بے ضابطگیوں کا انکشاف ہوا ہے جبکہ کئی سرکاری ہسپتالوں کی پارکنگز مبینہ طور پر باقاعدہ ٹینڈر کے بغیر چلائے جانے کا بھی معاملہ سامنے آگیا۔ مختلف ہسپتالوں کی پارکنگز سے حاصل ہونے والی آمدن میں تقریباً 50 کروڑ روپے کی مبینہ مالی بے ضابطگیوں کی تحقیقات کے لیے سیکرٹری سپیشلائزڈ ہیلتھ کیئر اینڈ میڈیکل ایجوکیشن پنجاب کو درخواست دے دی گئی ہے۔درخواست میں جناح ہسپتال لاہور، چلڈرن ہسپتال لاہور، پنجاب انسٹیٹیوٹ آف کارڈیالوجی، میو ہسپتال لاہور، لاہور جنرل ہسپتال، سروسز ہسپتال لاہور، ساہیوال ٹیچنگ ہسپتال، الائیڈ ہسپتال فیصل آباد اور ڈی ایچ کیو ہسپتال فیصل آباد کی پارکنگز سے حاصل ہونے والی آمدن پارکنگ ٹھیکوں اور فیس وصولی کے نظام کی مکمل تحقیقات کا مطالبہ کیا گیا ہے۔ درخواست گزار کے مطابق مذکورہ سرکاری ہسپتالوں میں پارکنگ سٹینڈز سے روزانہ بھاری رقم وصول کی جاتی ہے، تاہم پارکنگ فیس کی اصل وصولی، ٹھیکوں کی شرائط، ہسپتالوں کو حاصل ہونے والی آمدن اور سرکاری خزانے میں جمع ہونے والی رقم کے حوالے سے شفافیت پر سوالات موجود ہیں۔ درخواست میں الزام عائد کیا گیا ہے کہ پنجاب کے متعدد سرکاری ہسپتالوں کی پارکنگز بغیر باقاعدہ ٹینڈر کے چلائی جا رہی ہیں، جس سے نہ صرف شفافیت کے تقاضوں پر سوال اٹھتے ہیں بلکہ سرکاری خزانے کو ممکنہ مالی نقصان کا خدشہ بھی پیدا ہوتا ہے۔ دوسری جانب جناح ہسپتال لاہور کی پارکنگ کے حوالے سے سامنے آنے والی فیکٹ فائنڈنگ رپورٹ نے بھی پارکنگ نظام میں انتظامی اور مالی خامیوں کی نشاندہی کی ہے۔ رپورٹ کے مطابق پارکنگ کی روزانہ کیش کلیکشن اور رقم جمع کرانے کا مکمل قابلِ احتساب ریکارڈ موجود نہیں تھا جبکہ یکم جولائی 2026 سے پارکنگ کا خصوصی مالی آڈٹ کرانے کی سفارش بھی کی گئی ہے۔درخواست گزار نے مطالبہ کیا ہے کہ تمام متعلقہ ہسپتالوں کی پارکنگز کے گزشتہ کئی سال کے معاہدے، ٹینڈر دستاویزات، مقررہ فیس، روزانہ کی وصولی، ٹھیکیداروں سے وصول ہونے والی رقم اور ہسپتالوں یا سرکاری خزانے میں جمع کرائی جانے والی رقوم کا ریکارڈ طلب کیا جائے۔ درخواست میں تقریباً 50 کروڑ روپے کی مبینہ مالی بے ضابطگیوں کا فرانزک آڈٹ کرانے اور یہ تعین کرنے کا مطالبہ بھی کیا گیا ہے کہ پارکنگز سے حاصل ہونے والی اصل آمدن اور سرکاری ریکارڈ میں ظاہر کی گئی آمدن میں کوئی فرق تو موجود نہیں۔ درخواست گزار نے سیکرٹری سپیشلائزڈ ہیلتھ کیئر اینڈ میڈیکل ایجوکیشن پنجاب سے معاملے کی اعلی سطحی، شفاف اور غیرجانبدارانہ تحقیقات کرانے، بغیر ٹینڈر چلنے والی پارکنگز کی قانونی حیثیت واضح کرنے اور بے ضابطگی ثابت ہونے کی صورت میں ذمہ داروں کے خلاف کارروائی کا مطالبہ کیا ہے۔