عمرقید کے مجرم کی اپیل پر ڈی جی پنجاب فرانزک معاونت کیلئے طلب

لاہور(کورٹ رپورٹر) لاہور ہائیکورٹ کے جسٹس محمد امجد رفیق نے عمر قید کے مجرم راجہ شاہد کی اپیل پر ڈائریکٹر جنرل پنجاب فرانزک سائنس ایجنسی اور پراسیکیوٹر جنرل پنجاب چوہدری عرفان صادق تارڑکومعاونت کیلئے 21 ستمبر کوطلب کر لیا، تحریری حکم میں عدالت نے قرار دیا کہ ویڈیو شہادت کے استعمال، اس کی تصدیق، ملزمان کی شناخت اور قابلِ قبولیت سے متعلق قانونی اصولوں کی وضاحت ضروری ہے، عدالت نے سوال اٹھایا کہ اگر سی سی ٹی وی فوٹیج میں ملزمان کے چہرے واضح نہ ہوں تو کیا محض اس فوٹیج کی بنیاد پر ملزم کی شناخت کرکے اسے سزا دینا قانونی طور پر درست ہو گا؟ عدالت نے پرائیویٹ طور پر حاصل کی گئی سی سی ٹی وی فوٹیج کی قانونی حیثیت، اس کے قابلِ قبول ہونے اور تفتیش کے دوران سامنے آنے والے نقائص سے متعلق بھی اہم قانونی سوالات تشکیل دیئے، عدالت نے استفسار کیا کہ کیا صرف سی سی ٹی وی فوٹیج کی بنیاد پر کسی ملزم کو سزا دی جا سکتی ہے؟ عدالت نے معاونت طلب کی آیا کہ سی سی ٹی وی فوٹیج کی روشنی میں استغاثہ کے گواہوں کے بیانات کو مسترد کیا جاسکتا ہے یا نہیں،عدالت نے ملزمان کی شناخت کیلئے سی سی ٹی وی فوٹیج میں پکسل انہانسمنٹ اور فرانزک بنیادوں پر دوبارہ تجزیے کی ضرورت سے متعلق بھی سوالات اٹھائے، سماعت کے دوران قتل کیس کی سی سی ٹی وی فوٹیج کھلی عدالت میں چلا کر اس کا جائزہ بھی لیا گیا، عدالت نیمعاونت کیلئے ایڈووکیٹ سپریم کورٹ شیبا قیصر اور ڈپٹی پراسیکیوٹر جنرل محمد نوید عمر بھٹی کو عدالتی معاون مقرر کردیا ۔