مشیر وزیراعلیٰ پنجاب علی ڈار’وزیر زراعت پنجاب عاشق کرمانی کی زیر صدارت اجلاس

لاہور (اپنے سٹاف رپورٹر سے) مشیر وزیراعلی پنجاب برائے اے آئی و خصوصی اقدامات علی ڈار اور وزیر زراعت پنجاب سید محمد عاشق حسین شاہ کرمانی کی زیرصدارت محکمہ زراعت اور آفس آف اے آئی ڈیلیوری یونٹ کا اہم اجلاس ہوا جس میں پنجاب کے زرعی شعبے میں مصنوعی ذہانت(AI) کے عملی استعمال اور موجودہ زرعی ڈیٹا و نظام کو اے آئی سے مربوط کرنے پر تفصیلی غور کیا گیا۔ علی ڈار نے کہا کہ وزیراعلی پنجاب مریم نواز شریف کے وژن کے مطابق پنجاب میں اے آئی کا استعمال تمام شعبوں میں سبقت لے رہا ہے اور پنجاب ملک کا پہلا مکمل اے آئی ایبلڈ صوبہ بننے کی جانب تیزی سے گامزن ہے۔ انہوں نے کہا کہ آفس آف اے آئی ڈیلیوری یونٹ کا مقصد اے آئی وژن2029 ء کو عملی اور قابلِ پیمائش نتائج میں تبدیل کرنا ہے۔ اجلاس میں زرعی ڈیٹا اور محکمہ زراعت کے موجودہ نظام کو یکجا کرکے فصلوں کی بہتر منصوبہ بندی، مٹی اور پانی سے متعلق معلومات، موسم اور زرعی کیڑوں کی پیش گوئی، پیداوار کے تخمینے اور کسانوں کو بروقت زرعی مشاورت فراہم کرنے کے لیے اے آئی کے استعمال کا جائزہ لیا گیا۔ علی ڈار نے کہا کہ زراعت کے شعبے کو اے آئی سے ہم آہنگ کرنا حکومت کی اولین ترجیح ہے۔ اے آئی کی مدد سے پیداواری صلاحیت، وسائل کے موثر استعمال، مارکیٹ کی صورتحال اور زرعی فیصلہ سازی کو بہتر بنایا جائے گا۔ پنجاب حکومت مریم نواز شریف کے وژن کے تحت جدید ٹیکنالوجی کو کسان اور عام شہری کے فائدے سے منسلک کر رہی ہے۔