لاہور ہائیکورٹ، پٹرول کی قیمتوں میں روزانہ اضافہ’وفاق ‘ اوگرا کو نوٹس جاری

لاہور(کورٹ رپورٹر) لاہور ہائیکورٹ نے پٹرولیم مصنوعات کی قیمتوں میں اضافے کے خلاف درخواست پر وفاق اور اوگرا کو نوٹس جاری کردیا ۔لاہور ہائیکورٹ نے پٹرولیم مصنوعات کی قیمتوں میں روزانہ کی بنیاد پر ہونے والے اضافے کے خلاف دائر درخواست پر سماعت کرتے ہوئے وفاقی حکومت اور آئل اینڈ گیس ریگولیٹری اتھارٹی سمیت دیگر متعلقہ فریقین کو نوٹس جاری کر دئیے ہیں۔کیس کی سماعت جسٹس عابد عزیز شیخ کی سربراہی میں دو رکنی بینچ نے کی۔ درخواست گزار کی جانب سے موقف اختیار کیا گیا کہ صرف ایک ہفتے کے دوران پٹرول 30 روپے اور ڈیزل 25 روپے سے زائد فی لٹر مہنگا کیا گیا ہے، پاکستان میں پٹرولیم مصنوعات کی قیمتیں خطے کے کئی ممالک سے نمایاں طور پر زیادہ ہیں۔ قیمتوں میں اضافے کے لئے صرف عالمی منڈی کا حوالہ دینا کافی نہیں، حکومت فی لٹر قیمت کا مکمل اور شفاف فارمولہ عدالت کے سامنے پیش کرے۔ پٹرول اور ڈیزل کی قیمتوں میں مسلسل اضافے سے ملک میں مہنگائی کا نیا طوفان برپا ہو چکا ہے جس نے عام آدمی کی زندگی کو اجیرن بنا دیا ہے۔ درخواست میں عدالت سے استدعا کی گئی ہے کہ حکومت سے پٹرول اور ڈیزل کی قیمتوں کا مکمل پرائس بلڈ اپ طلب کیا جائے اور عوام کو پٹرولیم مصنوعات کی قیمتوں میں فوری ریلیف فراہم کرنے کا حکم دیا جائے۔