ہمیں احتجاج کا کوئی خوف نہیں ‘ حکومت ان سے نمٹنے کیلئے تیار ہے:عابد شیرعلی

فیصل آباد(آئی این پی)مسلم لیگ ن کے رہنما سینیٹر چوہدری عابد شیرعلی نے کہا ہے کہ ہمیں احتجاج کرنے
والوں کا کوئی خوف نہیں ‘ حکومت ان سے نمٹنے کیلئے تیار ہے ، وزیراعظم شہباز شریف اور وزیراعلیٰ پنجا ب مریم نواز شریف مہنگائی کے جن کو قابو کرنے کیلئے دن رات محنت کر رہے ہیں’ پیٹرولیم مصنوعات ہمیں درآمد کرنی پڑتی ہیں ‘حکومت مہنگی پیٹرولیم مصنوعات خرید کر عوام کو کم ریٹ پر مہیا کر رہی ہے’ موجودہ حکومت جلد مہنگائی پر قابو پائے گی۔ ن خیالات کا اظہار سینیٹر چوہدری عابد شیرعلی نے چنیوٹ بازار کے صدر ملک شاہد رسول کے آفس میں تاجروں سے بات چیت کرتے ہوئے کیا’ سینیٹر چوہدری عابد شیرعلی نے کہا کہ وزیراعظم محمد شہباز شریف نے موٹرسائیکل’ چنگ چی اور چھوٹی گاڑیوں کیلئے خصوصی ریلیف پیکیج کا اعلان کر دیا ہے’ شہری ریلیف پیکیج سے فائدہ اٹھائیں اور خود کو رجسٹرڈ کروا کر فی لیٹر پیٹرول پر 100 روپے کی رعایت حاصل کریں’ اس موقع پر انہوں نے پی ٹی آئی کی قیادت پر تنقید کرتے ہوئے کہا کہ ملک پہلے ہی حالت جنگ میں ہے اور پی ٹی آئی سمیت کئی سیاسی جماعتیں ملک میں عدم استحکام پیدا کرنے کی کوششوں میں مصروف ہیں’ ان کی ان حرکتوں سے ملک میں مزید بحرانی کیفیت پیدا ہو گی اور عام آدمی متاثر ہوگا’ انہوں نے کہا کہ ہمیں ان کا کوئی خوف نہیں ہے’ حکومت ان سے نمٹنے کیلئے تیار ہے’ ۔اس موقع پر چنیوٹ بازار کے صدر ملک شاہد رسول ‘ جنرل سیکرٹری میاں عمران’ سپریم انجمن تاجران کے صدر حاجی اسلم بھلی و دیگر تاجر رہنمائوں نے سینیٹر چوہدری عابد شیرعلی کی توجہ آٹھ بازاروں کے دکانداروں کو درپیش مسائل کی طرف دلائی۔