این بی اے کے لیجنڈری باسکٹ بال کھلاڑی باب پیٹٹ 93 برس کی عمر میں انتقال کرگئے۔ ان کی وفات 23 ستمبر کو میٹیری، لوزیانا میں واقع ان کے گھر پر ہوئی۔ ان کے اہلِ خانہ نے بتایا کہ وہ پُرسکون انداز میں دنیا سے رخصت ہوئے، تاہم موت کی وجہ نہیں بتائی گئی۔
باب پیٹٹ این بی اے کی تاریخ کے پہلے موسٹ ویلیوایبل پلیئر (MVP) تھے، انہوں نے 1956 میں لیگ کا افتتاحی ایم وی پی ایوارڈ جیتا جبکہ 1959 میں دوسری مرتبہ بھی یہ اعزاز حاصل کیا۔ وہ اپنے 11 سالہ این بی اے کیریئر کے دوران ہر سیزن آل اسٹار منتخب ہوئے۔
پیٹٹ نے اپنا پورا این بی اے کیریئر ہاکس فرنچائز کے ساتھ گزارا، جو اس وقت ملواکی اور بعد ازاں سینٹ لوئس میں تھی۔ 1958 کے این بی اے فائنلز میں انہوں نے سینٹ لوئس ہاکس کو بوسٹن سیلٹکس کے خلاف چیمپئن شپ دلانے میں اہم کردار ادا کیا اور فیصلہ کن چھٹے میچ میں 50 پوائنٹس اور 19 ری باؤنڈز حاصل کیے۔
وہ این بی اے کی تاریخ میں 20 ہزار پوائنٹس مکمل کرنے والے پہلے کھلاڑی بھی تھے۔ ریٹائرمنٹ کے وقت ان کے کریئر میں 20,880 پوائنٹس اور اوسطاً 26.4 پوائنٹس اور 16.2 ری باؤنڈز فی میچ تھے۔
باب پیٹٹ کو 1971 میں نائس متھ باسکٹ بال ہال آف فیم میں شامل کیا گیا۔ وہ چار مرتبہ آل اسٹار گیم ایم وی پی بھی رہے، جو بعد میں صرف کوبی برائنٹ نے برابر کیا۔
