ملکی نظام فلاپ ہو چکا، 30سال میں حالات بد سے بدتر ہوئے ہیں: محمد زبیر

لاہور (این این آئی) سابق گورنر سندھ محمد زبیر نے کہا ہے کہ ملکی نظام فلاپ ہو چکا، گزشتہ 3سال میں حالات بد سے بدتر ہوئے ہیں،صوبوں کی تعداد بڑھانے سے مسائل حل نہیں ہوں گے، اصل مسئلہ نااہلی ہے، جب تک نااہلی اور ناقص حکمرانی کے ذمہ دار افراد کا احتساب نہیں کیا جائے گا، نظام موثر طور پر نہیں چل سکے گا۔انہوں نے لاہور میں منعقدہ سیمینار سے خطاب کرتے ہوئے کہا کہ ملک کا نظام بالکل فلاپ ہو چکا ہے تاہم اس کا اندازہ ہمیں اس وقت ہوا جب محسن نقوی نے بھی اس حوالے سے بات کی، ہمارے ملکی معاشی اعشاریے مسلسل خراب ہو رہے ہیں اور گزشتہ 30برس کے دوران ہم بد سے بدتر حالات میں پہنچ گئے ہیں ۔ بنیادی مسئلہ یہ ہے کہ جن لوگوں کو ملک کو درست سمت میں لے جانے کی ذمہ داری دی گئی، وہی گزشتہ 65برس سے مختلف شکلوں میں اقتدار کا حصہ رہے ہیں۔محمد زبیر نے کہا کہ ہائبرڈ نظام نے ملک کو کبھی کچھ نہیں دیا تاہم آج کے ہائبرڈ نظام کو اسی صورت قبول کیا جا سکتا ہے جب اس کے مثبت نتائج عوام اور ملک کے سامنے آئیں۔