اینٹی کرپشن بڑے مگر مچھوں پر ہاتھ ڈالنے سے گریزاں میگا سیکنڈلز لٹک گئی

ملتان (وسیم بابر سے ) اینٹی کرپشن ملتان میں اربوں روپے مالیت کے مبینہ میگا کرپشن سکینڈلز طویل عرصے سے التواء کا شکار ہیں، جبکہ حالیہ دنوں میں سامنے آنے والی کارروائیاں زیادہ تر چھوٹے ملازمین تک محدود ہونے کا تاثر دیا جا رہا ہے۔ ڈسٹرکٹ اکاؤنٹس آفس، نشتر ٹو، ضلع کونسل، ملتان ڈویلپمنٹ اتھارٹی (ایم ڈی اے)، پارکس اینڈ ہارٹیکلچر اتھارٹی (پی ایچ اے)، لوکل گورنمنٹ اور دیگر محکموں میں مبینہ مالی بے ضابطگیوں کے مقدمات کی تفتیش مکمل کرکے چالان عدالتوں میں پیش نہ کیے گئے۔ تفصیلات کے مطابق اینٹی کرپشن ملتان میں گزشتہ کئی سال سے زیرِ التواء میگا سکینڈلز میں ڈسٹرکٹ اکاؤنٹس آفس ملتان کے چار مقدمات بھی شامل ہیں، جن میں محکمہ صوبائی ہائی ویز کے ساتھ مبینہ ملی بھگت سے لینڈ ایکوزیشن کی مد میں بوگس ادائیگیوں اور فرضی بلوں کے ذریعے ایک ارب روپے سے زائد کی کرپشن کے الزامات سامنے آئے تھے۔ ان مقدمات میں متعلقہ افسران اور ملازمین کے ملوث ہونے کے الزامات ہیں، نشتر ٹو میں پرچیز آفیسر سمیت دیگر افراد کے حوالے سے ایک ارب 25 کروڑ روپے کی مبینہ مالی بے ضابطگیوں کی نشاندہی کی گئی۔ ان معاملات میں سکیورٹی کمپنی کا کنٹریکٹ منسوخ کرکے مبینہ طور پر من پسند ٹھیکیدار کو نوازنے اور طبی آلات و مشینری کی خریداری میں بے ضابطگیوں کے الزامات شامل ہیں۔ضلع کونسل ملتان میں گزشتہ 5 سال کے دوران مبینہ جعلی کوٹیشنز، من پسند ٹھیکیداروں کو ٹھیکے دینے اور سیلابی صورتحال کے دوران استعمال ہونے والی مشینری کے میٹرز اور لاگ بکس میں ڈیزل و پٹرول کے مبینہ جعلی اندراجات کے ذریعے کروڑوں روپے کی مالی بے ضابطگیوں کے معاملات بھی زیرِ بحث ہیں۔اسی طرح ایم ڈی اے ملتان کے دفتر کی نئی عمارت کی تعمیر، مبینہ طور پر من پسند افراد کو پلاٹس کی الاٹمنٹ، غیر قانونی ہاؤسنگ سوسائٹیز اور کمرشل عمارتوں کی سرپرستی اور فیسوں کی مد میں مبینہ مالی خرد برد سے متعلق کیسز بھی تفتیش کے منتظر ہیں۔پی ایچ اے ملتان میں پبلسٹی بورڈز اور فیول کی مد میں 25 کروڑ روپے سے زائد کی مبینہ کرپشن کے الزامات سامنے آئے، جبکہ لوکل گورنمنٹ ملتان ڈویژن میں کتے مار مہم کے حوالے سے ایک ارب روپے کی مبینہ بوگس ادائیگیوں کا معاملہ بھی اینٹی کرپشن کو کمشنر ملتان نے ریفرنس بھجوایا ۔مذکورہ معاملے میں یونین کونسلوں کے سیکرٹریز پر مبینہ طور پر جعلی ادائیگیوں کے الزامات عائد کیے گئے ہیں۔میونسپل کارپوریشن ملتان میں کمرشل دکانوں کی نیلامی، اختیارات کے مبینہ ناجائز استعمال کے ذریعے من پسند افراد کو ٹھیکے دینے، نجی ہاؤسنگ سوسائٹی میں سڑک کی تعمیر، لائٹس برانچ میں فیول کے اخراجات اور قومی تقریبات کے دوران مٹھائیوں اور پینا فلیکس کی خریداری کے معاملات میں بھی سرکاری خزانے کو مبینہ طور پر کروڑوں روپے کا نقصان پہنچانے کے الزامات کی تحقیقات کی ضرورت ہے۔محکمہ پھاٹا ملتان میں کمرشلائزیشن کی مد میں تقریباً 24 ارب روپے کی ریکوری اور سابق افسران کے خلاف کرپشن کے الزامات سے متعلق معاملات بھی توجہ طلب ہیں۔ اس کے علاوہ محکمہ اوقاف، ایکسائز، انہار سمیت دیگر سرکاری محکموں کے کیسز بھی زیرِ التواء بتائے جاتے ہیں، جن میں بعض معاملات کو 10 سال سے زائد عرصہ گزرنے کے باوجود تحقیقات مکمل نہ ہونے کی شکایات ہیں۔شہریوں کا کہنا ہے کہ اگر چھوٹے ملازمین کے خلاف فوری کارروائیاں ممکن ہیں تو اربوں روپے کے مالی اسکینڈلز میں ملوث عناصر کے خلاف بھی قانون کے مطابق کارروائی مکمل کی جانی چاہیے۔ انہوں نے ڈی جی اینٹی کرپشن پنجاب سہیل ظفر چٹھہ سے مطالبہ کیا ہے کہ ملتان میں زیرِ التواء میگا اسکینڈلز کی تحقیقات کی پیش رفت کا جائزہ لیا جائے، ذمہ داران کا تعین کیا جائے اور قانون کے مطابق چالان جلد عدالتوں میں بھجوائے جائیں۔دوسری جانب اینٹی کرپشن کے ترجمان کے مطابق کرپشن کے خلاف کارروائیاں جاری ہیں، جبکہ بعض میگا اسکینڈلز کی تحقیقات میں قانونی پیچیدگیاں اور حکمِ امتناعی جیسے مسائل درپیش ہیں۔ ترجمان کا کہنا ہے کہ زیرِ التواء میگا اسکینڈلز کی تفتیش جلد مکمل کرنے کی کوشش کی جا رہی ہے۔
میگا سکینڈلز