IG پنجاب عبدالکریم کا دورہ سرگودھا،RPO اورڈی پی اوز کا استقبال

لاہور/ سرگودھا (کرائم رپورٹر) انسپکٹر جنرل پولیس پنجاب عبدالکریم نے سرگودھا کا دورہ کیا جہاں آر پی او سہیل اختر سکھیرا اور ڈی پی اوز نے ان کا استقبال کیا۔ آئی جی پنجاب نے یادگار شہداء پر حاضری دی، پھولوں کی چادر چڑھائی اور فاتحہ خوانی کی۔ پولیس کے چاق و چوبند دستے نے انہیں سلامی پیش کی۔ آئی جی پنجاب عبدالکریم کی زیرصدارت پولیس اجلاس منعقد ہوا جس میں افسران اور جوانوں کی کثیر تعداد نے شرکت کی۔ اس موقع پر آئی جی پنجاب نے کہا کہ حکومت پنجاب کی جانب سے پولیس کو پہلے سے زیادہ وسائل فراہم کیے گئے ہیں۔ وزیراعلیٰ پنجاب کے محفوظ پنجاب ویژن کو برقرار رکھنے کے لیے تمام افسران اور اہلکار بھرپور کردار ادا کریں۔ آئی جی پنجاب نے جرأت و بہادری کا مظاہرہ کرنے والے پولیس افسران اور اہلکاروں میں سرٹیفکیٹس اور انعامات بھی تقسیم کیے۔ دورے کے دوران آئی جی پنجاب عبدالکریم نے سٹاف ہاسٹل، پولیس ٹریننگ سکول اور ٹریفک کمپلیکس سرگودھا کی نئی عمارات کا افتتاح کیا۔ انہوں نے کہا کہ حکومت پنجاب کے خصوصی تعاون سے انتظامی اور دیگر امور میں بہتری کے لیے بھرپور اقدامات کیے گئے ہیں۔