ڈیڑھ ٹن وزنی آوارہ خلائی ٹیلی سکوپ زمین پر گرنے کے قریب

واشنگٹن (این این آئی)امریکی خلائی ایجنسی ناسا کی ملکیت ایک پرانی ٹیلی سکوپ اپنے مدار سے گرنے کے قریب پہنچ گئی ہے جو اسے بچانے کی کوشش ناکام ہونے کے بعد تیزی سے لرزتی ہوئی نیچے کی طرف آرہی ہے۔ امریکی سپیس فورس کی توقع ہے کہ سوئفٹ آبزرویٹری گر جائے گی اور جلد ہی تباہ ہو جائے گی۔ توقع ہے کہ ڈیڑھ ٹن وزنی اس ٹیلی سکوپ کا زیادہ تر حصہ زمین کے کرہ ہوائی میں داخل ہوتے ہی جل جائے گا۔ تاہم ناسا کے مشن کے چیف سائنٹسٹ براڈ سنکو کے مطابق شیشے کے کچھ حصوں کے ساتھ ساتھ سیسے سے بھی زیادہ کثافت والی ٹنگسٹن سے بنی چند دھاتی اشیا اس مرحلے سے بچ کر زمین تک پہنچ سکتی ہیں۔تخمینہ لگایا گیا ہے کہ ملبے کی باقیات سمندر میں گریں گی تاہم ایک وسیع علاقہ جس میں افریقہ، آسٹریلیا، ہندوستان، جنوب مشرقی ایشیا، وسطی اور جنوبی امریکہ شامل ہیں، ٹیلی سکوپ کے کرہ ہوائی میں دوبارہ داخلے کی زون کے اندر آتا ہے۔ سپیس فورس ٹیلی سکوپ کے مسلسل کم ہوتے ہوئے راستے کو مسلسل ٹریک کر رہی ہے۔