این سی سی آئی اے’فزیکل ٹیسٹ میں جعلسازی کی کوشش’2 افراد گرفتار

لاہور (کرائم رپورٹر) نیشنل سائبر کرائم انوسٹی گیشن ایجنسی (این سی سی آئی اے) لاہور زون نے بھرتیوں کے دوران فزیکل ٹیسٹ میں جعل سازی کی کوشش ناکام بناتے ہوئے دو افراد کو گرفتار کر لیا۔ ڈائریکٹر این سی سی آئی اے کی ہدایت پر کی گئی کارروائی کے دوران راشد اور وارث کو ایلیٹ ٹریننگ سنٹر سے حراست میں لیا گیا جہاں وہ اصل امیدواروں کی جگہ دوڑ میں حصہ لے رہے تھے۔ دونوں کے خلاف تھانہ ہیئر لاہور میں مقدمہ درج کر لیا گیا ہے۔ تفصیلات کے مطابق این سی سی آئی اے میں جاری بھرتیوں کے سلسلے میں امیدواروں کے فزیکل ٹیسٹ اور دوڑ کا عمل ایلیٹ ٹریننگ سنٹر میں جاری تھا کہ اس دوران انکشاف ہوا کہ دو افراد اصل امیدواروں کی جگہ ٹیسٹ میں حصہ لے رہے ہیں جبکہ متعلقہ امیدوار خود موقع پر موجود نہیں تھے۔ واقعے کی اطلاع پر ڈائریکٹر این سی سی آئی اے نے متعلقہ ٹیم کو فوری کارروائی کی ہدایت کی جس پر راشد اور وارث کو گرفتار کر لیا گیا۔ دونوں ملزمان کے خلاف مقدمہ نمبر 294/26 تھانہ ہیئر لاہور میں پاکستان پینل کوڈ کی دفعات 419 اور420 کے تحت درج کیا گیا ہے۔ ایڈیشنل ڈائریکٹر این سی سی آئی اے لاہور زون عاطف امیر نے کہا کہ بھرتیوں کا عمل میرٹ اور شفافیت کے اصولوں کے مطابق جاری ہے اور کسی کو بھی جعل سازی یا دھوکہ دہی کے ذریعے اس عمل کو متاثر کرنے کی اجازت نہیں دی جائے گی۔ انہوں نے واضح کیا کہ بھرتیوں میں کسی بھی قسم کی بے ضابطگی برداشت نہیں کی جائے گی اور میرٹ کی خلاف ورزی کرنے والوں کے خلاف قانون کے مطابق کارروائی عمل میں لائی جائے گی۔