اسلام آباد ‘ مقررہ مقدار سے کم فیول فراہم کرنے پر 6 پیٹرول پمپ سیل

اسلام آباد(آئی این پی )وفاقی دارالحکومت اسلام آباد میں مقررہ مقدار سے کم پیٹرول اور ڈیزل فراہم کرنے پر 40 سے زائد نوزلز اور 6 پیٹرول پمپس سیل کر دئیے گئے۔ ضلعی انتظامیہ کے اعلامیے کے مطابق اسلام آباد بھر میں پیٹرول پمپس کی انسپکشن کا سلسلہ جاری ہے، جس کے دوران پیٹرول اور ڈیزل کی پیمائش اور فراہم کی جانے والی مقدار کی جانچ پڑتال کی جا رہی ہے۔اعلامیے میں بتایا گیا ہے کہ مقررہ مقدار سے کم فیول فراہم کرنے پر 40 سے زائد نوزلز اور 6 پیٹرول پمپس سیل کیے گئے ہیں، جبکہ فیول کی پیمائش میں ردوبدل کے لیے استعمال ہونے والی الیکٹرانک ڈیوائسز بھی برآمد کی گئی ہیں۔ضلعی انتظامیہ کے مطابق الیکٹرانک ڈیوائسز کے ذریعے فیول کی پیمائش میں ہیر پھیر کرنے پر مزید 2 پیٹرول پمپس سیل کیے گئے اور عملے کو گرفتار کر لیا گیا۔ڈپٹی کمشنر اسلام آباد نے شہر بھر کے تمام پیٹرول پمپس کی انسپکشن یقینی بنانے کی ہدایت کی ہے۔ادھر پیٹرولیم ڈویژن نے فیول سبسڈی سے انکاری پیٹرول پمپس کے خلاف کاروائی کا حکم دیدیا۔پیٹرولیم ڈویژن کے مطابق ملک بھر میں 163 پیٹرول پمپس فیول سبسڈی نہیں دے رہے، اوگرا اور نیسپا فیول سبسڈی نہ دینے والے پیٹرول پمپس کے خلاف ایکشن لیں۔فیول سبسڈی نہ دینے والے سب سے زیادہ پیٹرول پمپس پنجاب میں ہیں، پنجاب میں 106 پیٹرول پمپس فیول سبسڈی فراہم نہیں کررہے۔پیٹرولیم ڈویژن کے مطابق سندھ میں 47، پختونخوا میں 5 اور جی بی میں 5 پیٹرول پمپس فیول سبسڈی دینے سے انکاری ہیں، پیٹرول پمپس کی تفصیل اوگرا اور نیسپا کو کاروائی کیلئے بھیج دی گئی ہے۔