ملتان ( سجاد بخاری سے ) مخدوم شاہ محمود قریشی عنقریب رہا ہونیوالے ‘ تمام مقدمات ختم ‘ مارچ میں سینٹ کا الیکشن لڑ کر راجہ ناصر کی جگہ سینٹ میں لیڈر آف دی اپوزیشن ہونگے۔ بیرسٹر گوہر کی جگہ چیئرمین تحریک صاف بن کر پارٹی کو متحدکرنے کی ذمہ داری بھی سنبھال سکتے ہیں۔ بیرسٹر گوہر کی کل لاہور کوٹ لکھپت جیل میں مخدوم شاہ محمود قریشی سے ملاقات اسی کا حصہ تھی ۔ انتہائی باخبر ذرائع نے بتایا ہے کہ نئے صوبوں کے قیام کی بابت بانی پی ٹی آئی عمران خان نے حامی بھر لی ہے۔ بدلے میں پہلے ان کے بھانجے قاسم زمان اور پھر 2 بہنوں کی رہائی کے بعد بشریٰ بیگم کی رہائی بھی عدالتوں کے ذریعے ہو جائے گی یا انہیں علاج کی غرض سے بنی گالہ کو سب جیل قرار دیکر شفٹ کیا جا سکتا ہے۔ عمران خان کا علاج بھی گزشتہ 3دنوں سے جاری ہے جبکہ مخدوم شاہ محمود قریشی کو بھی جیل سے ہسپتال منتقل کیا گیا ہے۔ جہاں پر ان کی فیملی کی موجودگی میں علاج ہو رہا ہے۔ ذرائع نے یہ بھی بتایا ہے کہ مخدوم شاہ محمود قریشی کے جن 2مقدمات کا ریکارڈ پیش نہیں کیا جا رہا اگلی پیشی پر وہ ریکارڈ پیش ہو جائے گا جس سے انکی ضمانت سو فیصد ہو جائے گی اور وہ رہا ہوتے ہی پارٹی کی قیادت سنبھال لیں گے۔ اس بات کی اجازت بانی پی ٹی آئی نے دیدی ہے۔ ذرائع نے بتایا کہ مخدوم شاہ محمود قریشی کو مارچ 2027ء میں سینٹ کے انتخاب میں کامیاب کرایا جائے گا جس کی بنیاد پر وہ سینٹ میں لیڈر آف دی اپوزیشن بن جائیں گے۔ اس پورے منصوبے کو عمران خان کے سامنے سلمان صفدر اور لطیف کھوسہ کی سوا 4گھنٹے کی ملاقات میں بحث کیا گیا ہے اور عمران خان نے اس کی باقاعدہ منظوری دیدی ہے۔ بیرسٹر گوہر کی لاہور آمد پر مخدوم شاہ محمود قریشی سے ملاقات اس پورے پلان کی بابت عمران خان کا پیغام مخدوم شاہ محمود قریشی کو پہنچانا مقصود تھا۔
