لاہور ملتان فضائی آلودگی انتہا کو پہنچ گئی موٹروے ١یم 4 اور 5 مختلف مقامات پر دھند کے باعث بند

لاہور، ملتان(نیوز ایجنسیاں، نامہ نگار خصوصی )پنجاب کے بڑے شہر لاہور اور ملتان شدید سموگ اور فضائی آلودگی کی لپیٹ میں ہیں ۔ صوبائی دارالحکومت میں فضائی آلودگی کی اوسط شرح 344 سے تجاوز کر گئی، جس کے باعث لاہور شہر دنیا کے آلودہ ترین شہروں میں پہلے نمبر پر ہے ۔، پیراگون سوسائٹی میں ایئر کوالٹی انڈیکس 671جبکہ ماڈل ٹائو ن میں 561ریکارڈ کیا گیا۔محکمہ موسمیات کے مطابق لاہور میں آ ئندہ24گھنٹوں میں بارش کے امکانات 10 فیصد ہیں، ہوا میں نمی کا تناسب 75 فیصد جبکہ ہوا کی رفتار 3 کلومیٹر فی گھنٹہ ریکارڈ کی گئی ہے، شہر کا کم سے کم درجہ حرارت 18 اور زیادہ سے زیادہ 29 ڈگری سینٹی گریڈ رہنے کا امکان ہے۔دوسری جانب ملتان میں بھی سموگ کی صورتحال انتہائی تشویشناک ہے، جہاں فضائی آلودگی کی اوسط شرح 507 پارٹیکولیٹ میٹرز ریکارڈ کی گئی، شہر میں سموگ کے باعث شہریوں کو شدید مشکلات کا سامنا ہے۔ملتان سمیت جنوبی پنجاب کے مختلف علاقوں میں آئندہ دو سے تین روز کے دوران بارشوں کی پیشگوئی کی گئی ہے، بارش کے باعث فضائی آلودگی اور سموگ کی شدت میں کمی آنے کی امید ہے، تاہم بارشوں کے بعد سردی کی شدت میں اضافے اور درجہ حرارت میں مزید کمی کا امکان بھی ظاہر کیا گیا ہے۔طبی ماہرین کی جانب سے شہریوں کو غیر ضروری طور پر گھروں سے باہر نکلنے سے گریز، ماسک کے استعمال اور آنکھوں و سانس کی حفاظت کیلئے احتیاطی تدابیر اختیار کرنے کی ہدایت کی گئی ہے۔ ادھر ملک کے مختلف علاقوں میں شدید دھند کے باعث موٹروے ایم 4 اور ایم 5 کے اہم حصوں پر ٹریفک کی آمدورفت متاثر ہوگئی، موٹروے پولیس نے مسافروں کی جان و مال کے تحفظ کے لئے متعدد سیکشنز بند کردئیے۔ترجمان موٹروے پولیس سنٹرل ریجن سید عمران احمد کے مطابق موٹروے ایم 4 کو پنڈی بھٹیاں سے عبدالحکیم تک ہیوی ٹریفک کے لئے بند کیا گیا ہے، جبکہ موٹروے ایم 5 پر ملتان سے ظاہر پیر تک دھند کے باعث ٹریفک کی آمدورفت روک دی گئی ہے۔ترجمان کا کہنا ہے کہ موٹرویز کی بندش کا مقصد شہریوں کی جان و مال کا تحفظ یقینی بنانا ہے۔ دھند کے دوران غیر ضروری سفر سے گریز کیا جائے اور اگر سفر ناگزیر ہو تو دن کی روشنی میں سفر کو ترجیح دی جائے۔موٹروے پولیس نے شہریوں کو ہدایت کی ہے کہ دھند کے موسم میں محفوظ سفر کے لئے صبح 10 بجے سے شام 6 بجے تک کا وقت اختیار کریں، دوران سفر گاڑی کی رفتار کم رکھیں اور اگلی گاڑی سے مناسب فاصلہ برقرار رکھیں۔ترجمان نے مزید کہا کہ ڈرائیورز لین کی پابندی کریں، غیر ضروری اوورٹیکنگ اور اچانک بریک لگانے سے گریز کریں، جبکہ دھند میں فوگ لائٹس کا استعمال کریں اور گاڑی کی ہیڈ لائٹس، بیک لائٹس اور وائپرز کو درست حالت میں رکھیں۔موٹروے پولیس نے شہریوں سے اپیل کی ہے کہ محفوظ سفر کے لئے احتیاطی تدابیر پر عمل کریں اور دھند کے دوران غیر ضروری خطرہ مول نہ لیں۔
فضائی آلودگی