اسلام آباد (مانیٹرنگ ڈیسک) سابق وزیرخزانہ اسحاق ڈارکانام بھی بلیک لسٹ میں شامل کر دیا گیا اور ان کا پاسپورٹ بلاک کردیا گیا۔ نجی ٹی وی نے ذرائع کے حوالے سے کہا ہے کہ نیب نے درخواست میں موقف اختیار کیا ہے کہ سابق وزیر خزانہ اثاثہ جات ریفرنس میں اشتہاری اور مفرور ہیں، اسحاق ڈار کی انٹرپول کے ذریعے گرفتاری کےلئے کوشش جاری ہے وزارت داخلہ نے نیب کی درخواست پرسابق وزیر خزانہ اسحاق کا نام بلیک لسٹ میں ڈال دیا اور ان کا نام پاسپورٹ بھی بلاک کردیا گیا۔ جبکہ فیڈرل بورڈ آف ریونیو نے پانامہ کیس میں نوٹسز کا جواب نہ دینے پر مسلم لیگ (ن) کے قائد و سابق وزیر اعظم نواز شریف کے صاحبزادوں حسن نواز اور حسین نواز کی رہائشگاہ جاتی امراءکے باہر نوٹسز چسپاں کر دیئے۔ ذرائع کے مطابق ایف بی آر کی جانب سے حسن واز اور حسین نواز کو بار ہا نوٹسز جاری کئے گئے تھے جن میں ان سے 2008ءسے 2017ءتک کی ٹیکس ریٹرن اور ویلتھ سٹیٹمنٹ مانگی گئی تھی مگر ان کی جانب سے کوئی جواب نہ دیا گیا جس پر ایف بی آر کی جانب سے کارروائی کی گئی اور جاتی امراءکے باہر نوٹسز چسپاں کیے گئے ۔ ان نوٹسز میں حسن نواز اور حسین نواز کو ایک ماہ کی مہلت دے گئی ہے۔ اگر دونوں ایک ماہ میں جواب جمع نہیں کرواتے تو انکے خلاف قانونی کارروائی عمل میں لائی جائے گی۔ وزارتِ داخلہ نے سابق وزیرِ خزانہ اسحاق ڈار کو بلیک لسٹ کرتے ہوئے ان کا پاسپورٹ بلاک کر دیا ہے۔ قومی احتساب بیورو ذرائع کے مطابق نیب کی درخواست پر اسحاق ڈار کا نام بلیک لسٹ میں ڈالا گیا جبکہ ان کا پاسپورٹ بھی بلاک کیا گیا۔ خیال رہے کہ اسحاق ڈار اثاثہ جات ریفرنس کے اشتہاری اور مفرور ملزم ہیں جنھیں انٹرپول کے ذریعے گرفتار کر کے پاکستان لانے کی کوششیں کی جا رہی ہیں۔ یاد رہے کہ وزارتِ داخلہ نے گزشتہ روز سابق وزیرِاعظم نواز شریف کے دونوں بیٹوں حسن اور حسین نواز کے پاکستانی پاسپورٹ بلاک کرتے ہوئے ان کے نام بھی بلیک لسٹ میں ڈال دیے تھے۔ سابق وزیر اعظم کے بیٹے اب پاکستانی پاسپورٹ استعمال نہیں کرسکیں گے۔ حسن اور حسین نواز نیب ریفرنسز میں اشتہاری ملزم ہیں۔ ان شخصیات کے علاوہ وزارتِ داخلہ نے گزشتہ روز کابینہ کمیٹی کی منظوری کے بعد پی ٹی آئی چیئرمین عمران خان کے قریبی دوست زلفی بخاری کا نام بھی ای سی ایل میں شامل کر دیا تھا۔ نیب راولپنڈی زلفی بخاری کی آف شور کمپنیوں کے حوالے سے تحقیقات کر رہا ہے۔ دوسری جانب سابق پرنسپل سیکرٹری فواد حسن فواد کا نام بھی ای سی ایل میں شامل کر دیا گیا ہے۔ نیب نے ان کا نام ای سی ایل میں ڈالنے کی سفارش کی تھی۔ فواد حسن فواد اس وقت آشیانہ ہاو¿سنگ سکیم سکینڈل میں نیب کی حراست میں ہیں۔
