سابق آسٹریلوی کرکٹر ڈیوڈ وارنر کو سڈنی کی عدالت نے شراب پی کر گاڑی چلانے کے جرم میں 1,500 آسٹریلوی ڈالر جرمانہ عائد کیا ہے۔ عدالت نے انہیں 12 ماہ تک گاڑی میں الکحل انٹرلاک/بریتھالائزر ڈیوائس استعمال کرنے کا حکم بھی دیا۔
39 سالہ وارنر نے گزشتہ ماہ درمیانے درجے کے ڈرنک ڈرائیونگ جرم کا اعتراف کیا تھا۔ یہ واقعہ اپریل میں پیش آیا جب وہ سڈنی کے مشرقی علاقے میں اپنے خاندان کے ہمراہ گاڑی چلا رہے تھے۔ پولیس کے مطابق ان کے خون میں الکحل کی مقدار قانونی حد سے دو گنا سے بھی زیادہ تھی۔
عدالت میں بتایا گیا کہ وارنر نے پولیس کی رینڈم بریتھ ٹیسٹنگ سائٹ دیکھ کر گاڑی روک دی اور ڈرائیونگ سیٹ تبدیل کرنے کی کوشش کی، تاہم بعد میں ان کا بریتھ ٹیسٹ کیا گیا اور انہیں گرفتار کر لیا گیا۔ گاڑی میں ان کے بچے بھی موجود تھے، جسے عدالت نے جرم کی سنگینی میں اضافی عنصر قرار دیا۔
وارنر کے وکیل نے عدالت کو بتایا کہ ان کے مؤکل نے ٹریفک آفینڈر پروگرام مکمل کیا، اپنی غلطی تسلیم کی اور معذرت بھی کی۔ جج کلیئر فارنان نے کہا کہ وارنر کے دوبارہ ایسا جرم کرنے کا امکان کم ہے، تاہم ڈرنک ڈرائیونگ سڑکوں پر حادثات کی ایک اہم وجہ ہے۔
عدالت کے حکم کے مطابق بریتھالائزر انٹرلاک ڈیوائس اس وقت گاڑی کا انجن اسٹارٹ نہیں ہونے دے گی جب ڈیوائس الکحل کی موجودگی کا پتا چلائے گی۔ وارنر سماعت کے بعد صحافیوں سے بات کیے بغیر عدالت سے روانہ ہوگئے۔
