قومی کرکٹر آج سے فٹنس کیمپ میں خون گرمائیں گے

لاہور(آئی این پی)ایشیا کپ کیلئے قومی کرکٹ ٹیم کے ممکنہ کھلاڑیوں کی فٹنس اور کارکردگی کو بہتر بنانے کیلئے باقاعدہ ٹریننگ کا آغازآج سے تربیتی کیمپ آرمی سکول آف فزیکل ٹریننگ ایبٹ آباد میں شروع ہوگا جو 31اگست تک جاری رہے گا جبکہ دوسرے مرحلہ میں ٹریننگ کیمپ ستمبر کے پہلے ہفتے لاہور میں لگایا جائے گاجس میں پلیئرز کی بیٹنگ، باﺅلنگ اور فیلڈنگ میں موجود خامیوں کو بہتر بنانے کی کوشش کی جائے گی، پہلے مرحلے کیلئے 27 اگست سے 31 اگست کی تاریخ مقر ر کی گئی ہے اور کھلاڑیوں نے 27اگست کی صبح نیشنل کرکٹ اکیڈمی میں رپورٹ کی اور وہ صبح سویرے ہی ایبٹ آباد کیلئے روانہ ہوگئے تھے اور ایبٹ آباد میں شام کو آرام کے بعد باقاعدہ ٹریننگ کا آغاز آج ہی ہوگا، کھلاڑیوں کی فٹنس پر کام ہوگا اور انہیں آپس میں ایک دوسرے کے ساتھ مل بیٹھنے کا موقع ملے گا، ٹریننگ کیمپ میں شرکت کرنےوالے کھلاڑیوں میں فخر زمان، امام الحق، بابر اعظم، شعیب ملک، سرفراز احمد، آصف علی، شاداب خان، فہیم اشرف، محمد عامر، حسن علی، عثمان شنواری، محمد نواز، عماد وسیم، حارث سہیل، محمد حفیظ، یاسر شاہ، شاہین شاہ آفریدی، جنید خان، صاحب زادہ فرحان، شان مسعود، عثمان صلاح الدین، اسد شفیق، بلال آصف، محمد اصغر، راحت علی اور میر حمزہ شامل ہیں۔ٹیم مینجمنٹ میں ہیڈ کوچ مکی آرتھر، بیٹنگ کوچ گرانٹ فلاور، ٹرینر گرانٹ لوڈن، باﺅلنگ کوچ اظہر محمود، فزیو تھراپسٹ کلف اور اینالسٹ طلحہ اعجاز شامل ہیں۔ پی سی بی کے ترجمان کے مطابق ایشیا کپ کے ٹریننگ کیمپ کے دوسرے مرحلے کا اعلان بعد میں کیا جائے گا۔ ایشیا کپ کرکٹ ٹورنامنٹ 15 سے 28 ستمبر تک یو اے ای میں ہوگا۔ پاکستانی ٹیم کا پہلا میچ 16ستمبر کو کوالیفائر ٹیم سے ہوگا۔بھارت اور پاکستان کی ٹیمیں 19ستمبر کو ٹکرائیں گی۔ ایشیا کپ میں شریک6 ٹیموں کو2 گروپس میں تقسیم کیا گیا ہے۔ گروپ اے میں پاکستان،، بھارت اور ایک کوالیفائر ٹیم شامل ہوگی جبکہ گروپ بی میں سری لنکا،، بنگلہ دیش اور افغانستان کورکھا گیا ہے، ہر گروپ سے سر فہرست 2 ٹیمیں سپر چار مرحلے میں جگہ پکی کرنے میں کامیاب رہیں گی۔ ٹاپ ٹیموں کے درمیان فائنل کھیلا جائے گا۔افتتاحی میچ15 ستمبر کو بنگلہ دیش اور سری لنکا کے درمیان کھیلا جائے گا۔16 ستمبر کو پاکستانی ٹیم گروپ اے کی کوالیفائر ٹیم کے خلاف ایکشن میں دکھائی دیگی۔ گرین شرٹس ایشیائی ایونٹ کے دوسرے میچ میں 19 ستمبر کو روایتی حریف بھارت کے خلاف ایکشن میں دکھائی دیں گے۔ سپر فور مرحلے کا آغاز21 ستمبر سے شروع ہوکر 26 ستمبر تک جاری رہے گا جبکہ فائنل28 ستمبر کو رکھا گیا ہے۔