’لالہ ‘نے بوم بوم کاخطاب دینے والے پلیئرکانام بتادیا

کراچی(نیوزایجنسیاں) سابق اسٹار آل رانڈر شاہد خان آفریدی نے انکشاف کیا ہے کہ انہیں بوم بوم کا خطاب بھارتی کرکٹر روی شاستری نے دیا۔ سماجی رابطے کی ویب سائٹ ٹویٹر پر سوال جواب کے سیشن میں ایک شائق نے شاہد آفریدی سے پوچھا کہ آپ کو پہلی باربوم بوم کس نے کہا۔شاہد آفریدی نے شائق کے سوال کا جواب دیتے ہوئے کہا کہ انہیں یہ نک نیم سابق بھارتی کرکٹر روی شاستری نے دیا جو ان دنوں میں کمنٹری کیا کرتے تھے۔ سابق بھارتی کھلاڑی اور بھارتی کرکٹ ٹیم کے موجودہ کوچ روی شاستری نے پہلی مرتبہ 2005میں شاہد آفریدی کو بوم بوم کہہ کر پکارا تھا پاکستانی کرکٹ ٹیم سیریز کھیلنے کیلئے بھارت میں موجود تھی۔شاہد آفریدی نے اس سیریز کے ایک میچ میں 45 گیندوں پر سنچری بنائی تھی جو اس وقت کی دوسری تیز ترین سنچری تھی اور یہی وہ موقع تھا جب روی شاستری نے ان کیلئے بوم بوم کا لفظ استعمال کیا اور پھر دیکھتے ہی دیکھتے وہ پوری دنیا میں اس نام سے پہچانے جانے لگے۔