لاہور (شوبز ڈیسک ) نامور ماڈل و اداکارہ ایمان علی نے کہا ہے کہ پاکستانی نوجوانوں میں بھرپور ٹیلنٹ ہے جو بھارت سے بہتر کام کر رہے ہیں ، پاکستانی فنکاروں نے دنیا بھر میں اپنا لوہا منوایا ہے ، اس لیے دنیا بھر میں ہمارے فنکاروں کو عزت کی نگاہ سے دیکھا جاتا ہے ۔ انہوں نے کہا کہ پاکستان میں ٹیلنٹ کی کمی نہیں ۔ میرے نزدیک منفرد کرداروں کی اہمیت ہے جس کردار میں پرفارمنس کا مارجن زیادہ ہو اس میں حقیقت کا رنگ بھرنے کے لئے بہت محنت کرتی ہوں ۔ محنت سے کام کرنے والے فنکار کو کبھی زوال نہیں آتا ۔ ایمان علی کا کہنا تھا کہ میں نے اپنے کیریئر کا آغاز ماڈلنگ سے کیا ہے اس لیے ماڈلنگ کو چھوڑنے کا تصور نہیں کر سکتی ۔ میں ان دنوں کمرشلز اور ٹی وی ڈراموں میں مصروف ہوں جس کی وجہ سے ماڈلنگ پر کم توجہ دے رہی ہوں ۔
