سرفراز کو گرین شرٹس سے کم بیک کی امید ،دبئی ٹیسٹ کا کل سے آغاز

دبئی (اے پی پی) پاکستان اور نیوزی لینڈ کی کرکٹ ٹیموں کے درمیان تین ٹیسٹ میچوں پر مشتمل سیریز کا دوسرا میچ (کل) ہفتہ سے دبئی میں شروع ہوگا۔ نیوزی لینڈ کی ٹیم کو تین میچوں کی سیریز میں پاکستان کے خلاف 1-0 کی برتری حاصل ہے۔ دبئی انٹرنیشنل کرکٹ سٹیڈیم میں میچ صبح11بجے شروع ہوگا۔کیویز ٹیم نے سیریز کے پہلے میچ میں سنسنی خیز مقابلے کے بعد 4 رنز سے شکست دیکر سیریز میں 1-0 کی برتری قائم کی تھی۔ پاکستان ٹیم کے قائدسرفرازاحمدنے کہاہے کہ وہ دوسرے میچ میں کیویز کو شکست دے کر سیریز میں جاندار کم بیک کریں گے ۔ ہم میچ جیتنے کی پوزیشن میں تھے لیکن بلے بازوں کی ناقص کارکردگی کی وجہ سے ہم میچ فنش نہ کر سکے، اب تمام تر توجہ اگلے میچ پر مرکوز ہے، امید ہے کہ کھلاڑی ان غلطیوں سے سبق سیکھ کر دوسرے میچ میں پوری تیاری کے ساتھ میدان میں اتریں گے۔ ان کا کہنا ہے کہ باﺅلرز کی کارکردگی حوصلہ افزا ہے ۔امید ہے بلے بازذمہ دارانہ کھیل کامظاہرہ کریں گے ۔کیوی کپتان کین ولیمسن نے کہا ہے کہپاکستان کو پہلے میچ میں شکست دینے کے بعد ان کی ٹیم کے حوصلے بلند ہیں۔ انہوں نے کہا ہے کہ دوسرے میچ میں بھی گرین شرٹس کو شکست دے کر سیریز جیتنے کے لئے بھرپور کوشش کریں گے۔ دوسرا میچ جیت کر سیریز میں فیصلہ کن برتری حاصل کرنے کیلئے سرتوڑکوشش کریں گے۔باﺅلرز کی کارکردگی پلس پوائنٹ ہے۔امید ہے دوسرے مقابلے میں بھی باﺅلرزاپنی عمدہ پرفارمنس کاتسلسل برقراررکھیں گے۔فتح ٹیم کی اجتماعی کوششوں کا نتیجہ ہے، کھلاڑیوں نے جس طرح سے فائٹ کی وہ قابل ستائش ہے۔ دونوں ٹیموں کے درمیان سیریز کے دوسرے ٹیسٹ میچ میں کانٹے دار مقابلے کی توقع کی جا رہی ہے۔ دونوں ٹیموں کے درمیان دوسرا ٹیسٹ 24 سے 28 نومبر تک دبئی جبکہ تیسرا اور آخری ٹیسٹ 3 سے 7 دسمبر تک ابوظہبی میں کھیلا جائے گا۔