تیمور علی خان والدین سے بھی بازی لے گیا

ممبئی (ویب ڈیسک)بولی وڈ اداکارہ کرینہ کپور خان اور اداکار سیف علی خان کا بیٹا تیمور علی خان صرف 2 سال کی عمر میں ہی اپنے والدین سے زیادہ مقبول ہوچکا ہے۔20 دسمبر کو اپنی دوسری سالگرہ منانے والے تیمور کی تصاویر اور خبریں روزانہ ہی میڈیا کی زینت بنتی ہیں اور وہ میڈیا پر ایسے چھائے ہوئے ہیں کہ انہوں نے اپنے والدین کو بھی پیچھے چھوڑ دیا ہے۔درحقیقت انٹرنیٹ سرچنگ میں بھی وہ اپنے والدین سے آگے ہیں، یاہو کی 2018 میں ہارٹ تھروب شخصیات میں کرینہ کپور یا سیف علی خان کی بجائے ان کے بیٹے تیمور علی خان 5 ویں نمبر پر رہے۔کرینہ اور سیف نے اپنے بیٹے کی دوسری سالگرہ جنوبی افریقہ میں منائی جہاں وہ ایک اشتہار کی شوٹنگ میں مصروف ہیں۔پیدائش کے بعد سے ہی تیمور علی خان فوٹوگرافرز کی توجہ کا مرکز ہیں اور وہ خود بھی فوٹوگرافرز کو کافی اچھا ردعمل دیتے ہیں۔تیمور علی خان کی ڈول بھی کچھ عرصے پہلے سامنے آئی تھی۔اس بارے میں ہندوستان ٹائمز سے بات کرتے ہوئے سیف علی خان نے کہا کہ انہیں لگتا ہے کہ اب وہ اپنے بیٹے کا نام ٹریڈ مارک میں شامل کریں، تاکہ ان کے نام کو استعمال کرکے کوئی فائدہ حاصل نہ کر سکے۔ساتھ ہی اداکار نے کہا کہ تیمور علی خان کی ڈول بنانے والوں کو کم سے کم ایک ڈول ان کے پاس بھجوانی چاہیے۔ساتھ ہی سیف علی خان نے کہا کہ اچھا ہے کہ اگر ان کے بیٹے کا نام اور شکل و صورت کسی کو کوئی فائدہ دے رہی ہے، تاہم وہ اس کے بدلے اللہ تعالی سے صرف اپنے بیٹے کی سلامتی اور خیریت چاہتے ہیں۔گزشتہ دنوں کافی ود کرن میں بات کرتے ہوئے سیف علی خان نے انکشاف کیا کہ انہیں رپورٹرز نے بتایا کہ تیمور کی تصاویر امیتابھ، شاہ رخ اور عامر جیسے اداکاروں سے بھی زیادہ پیسوں میں فروخت ہوتی ہیں۔یہی نہیں بلکہ اس سے قبل چند ہفتے پہلے یہ خبر بھی سامنے آئی تھی کہ تیمور علی خان کا خیال رکھنے والی آیا کی تنخواہ بھارتی وزیر اعظم نریندر مودی سے بھی کہیں زیادہ ہے۔تیمور علی خان ابھی سے ارب پتی بن چکے ہیں، بس انہیں چند سال مزید انتظار کرنا ہوگا۔جی ہاں بھوپال کے جس عظیم الشان پٹودی ہاو¿س میں ان کی پہلی سالگرہ منائی گئی وہ سترہ سال بعد یعنی جب تیمور 18 سال کے ہوجائیں گے، تو ان کی ملکیت بن جائے گا۔اس وقت اس گھر کی مالیت 800 کروڑ انڈین روپے (14 ارب پاکستانی روپے سے زائد) ہے اور اندازہ لگایا جاسکتا ہے کہ بیس سال بعد وہ کہاں تک جا پہنچے گی۔کرینہ اور سیف کی شادی 2012 میں ہوئی تھی، یہ کرینہ کپور کی پہلی جبکہ سیف علی خان کی دوسری شادی ہے۔اداکارہ کے پہلے بیٹے تیمور کی پیدائش 20 دسمبر 2016 کو ممبئی کے ایک ہسپتال میں ہوئی۔اس سے قبل سیف علی خان نے 1991 میں اداکارہ امریتا سنگھ سے شادی کی تھی، تاہم 2004 میں ان دونوں میں علیحدگی ہوگئی، امریتا سنگھ سے سیف علی خان کے دو بچے سارہ اور ابراہیم ہیں۔