پاکستان کے سابق وزیراعظم عمران خان کی سابق اہلیہ جمائما گولڈ اسمتھ نے دوسری شادی کرلی۔ برطانوی میڈیا کے مطابق 52 سالہ جمائما نے آئرش-آسٹریلوی کاروباری شخصیت کیمرون او ریلی کو اپنا شریکِ حیات بنایا ہے۔
رپورٹس کے مطابق جمائما اور 62 سالہ کیمرون او ریلی کی ملاقات کام کے سلسلے میں ہوئی تھی۔ دونوں کے درمیان دوستی کے بعد تعلق قائم ہوا اور وہ ایک سال سے زائد عرصے سے ایک دوسرے کے ساتھ تھے۔ جوڑے نے اپنی نجی زندگی کو میڈیا کی نظروں سے دور رکھا۔
کیمرون او ریلی معروف آئرش میڈیا خاندان سے تعلق رکھتے ہیں۔ وہ سرمایہ کاری اور کاروباری شعبے میں کام کرچکے ہیں اور دستاویزی فلموں کی تیاری سے بھی وابستہ رہے ہیں۔ ان کی اس سے قبل الز او ریلی سے شادی ہوئی تھی، جو 2022 میں علیحدگی پر ختم ہوئی۔
جمائما گولڈ اسمتھ نے 1995 میں عمران خان سے شادی کی تھی۔ دونوں کے دو بیٹے ہیں اور 2004 میں ان کی طلاق ہوگئی تھی۔
برطانوی میڈیا کے مطابق جمائما اور کیمرون او ریلی کی شادی کی خبر خاندان کی جانب سے بھی شیئر کی گئی، تاہم دونوں نے خود اس حوالے سے کوئی تفصیلی عوامی بیان جاری نہیں کیا۔
