اسلام آباد یونائیٹڈ اور لاہور قلندرز آج آمنے سامنے ہونگے

کراچی (سپورٹس رپورٹر) پاکستان سپر لیگ (پی ایس ایل) کے چوتھے ایڈیشن کے پانچویں اور آخری مرحلے کا پہلا میچ (آج) ہفتہ کو نیشنل کرکٹ سٹیڈیم کراچی میں کھیلا جائے گا۔ میچ پاکستان کے معیاری وقت کے مطابق رات سات بجے برق قمقموں کی روشنی میں شروع ہوگا۔ پی ایس ایل کے چوتھے ایڈیشن کاآخری مرحلہ (آج)ہفتہ سے پاکستان میں سجے گا اورایونٹ کے بقایا 8میچز نیشنل سٹیڈیم کراچی میں کھیلے جائیں گے، لاہور قلندرز اسلام آباد یونائیٹڈ کے مابین میچ (آج) کھیلا جائے گا۔38غیر ملکی کر کٹرز،سپورٹ اسٹاف، براڈ کاسٹرز، کمنٹیٹرز اور پی سی بی مہمانوں سمیت تقریبا 100سے زائد غیر ملکی پاکستان پہنچ گئے،نیشنل اسٹیڈیم کراچی میں تیاریوں کو آخری شکل دیدی گئی، سیکیورٹی اداروں نے اسٹیڈیم اور اطراف کا کنٹرول سنبھال لیا ہے،ملک کے سب سے بڑے شہر میں سیکیورٹی ہائی الرٹ ہے اور کرکٹ کے بخار نے کرکٹ کے دیوانوں کو اپنی لپیٹ میں لیا ہوا ہے،کراچی کے تین بڑے ہوٹلوں میں کھلاڑیوں، آفیشلز، براڈ کاسٹرز اور دیگر مہمانوں کو ٹھہرانے کیلئے کمرے بک کرائے گئے ہیں جہاں انتہائی سخت سیکیورٹی ہے۔کراچی میں ہونے والے 8 میچوں میں شرکت کیلئے 6ٹیموں کے 38غیر ملکی کرکٹرز کراچی پہنچ گئے ہیں۔ سپورٹ اسٹاف، براڈ کاسٹرز، کمنٹیٹرز اور پی سی بی مہمانوں سمیت تقریبا 100 سے زائد غیر ملکی پی ایس ایل میچوں کیلئے پاکستان آئے۔کمنٹیٹرز میں جنوبی افریقا کے سابق کرکٹر جونٹی رھوڈز، نیوزی لینڈ کے ڈینی موریسن اور انگلینڈ کے ایلن ویلکنز شامل ہیں۔غیر ملکی کرکٹرز کی مصدقہ فہرست کے مطابق جمعرات کی شب کراچی کنگز کے ہیڈ کوچ مکی آرتھر کے علاوہ کھلاڑی کولن منرو، کولن انگرم، سکندر رضا، بین ڈک، لیم لیونگ اسٹون، ایرون سمرز اور روی بوپارا شامل ہیں۔دیگر غیر ملکیوں میں لاہور قلندرز کی ٹیم میں اینٹون ڈیوسچ، ہرڈس ولیون، سندیپ لما چن، رکی ویسلز اور ریان ٹین ڈیسکوٹے، پشاور زلمی میں ڈیرن سیمی، کیرون پولارڈ، لائم ڈائی سن، ٹائمل ملز، لینڈل سمنز، وائن میڈسن اور آندرے فلیچر شامل ہیں۔اسلام آباد میں لیوک رونچی، سمت پٹیل، فلپ سالٹ، وائن پارنیل، چیڈک والٹن اور کیمرون ڈیل پورٹ شامل ہیں۔ کوئٹہ میں شین واٹسن، ڈیوائن براوو، رائیلی روسو، میکس والر، ہیری گیرنی، ڈیوائن اسمتھ، فواد احمد جبکہ ملتان سلطانز میں ڈین کرسچین، جیمز وینس، کرس گرین، لوری اونز اور جانسن چارلس شامل ہیں۔
پاکستان سپر لیگ کا 27واں میچ (کل)ہفتہ کو لاہور قلندرز اور اسلام آباد یونائیٹڈ کے مابین نیشنل سٹڈیم کراچی میں کھیلا جائے گا۔10مارچ کو کراچی کنگز اور کوئٹہ گلیڈی ایٹرز،11مارچ کو لاہور قلندرز اور ملتان سلطان،11مارچ کو دوسرا میچ کراچی کنگز اور پشاور زلمی کے مابین میچ کھیلا جائے گا۔