کراچی (ویب ڈیسک): محکمہ موسمیات نے خبردار کیا ہے کہ کراچی میں جمعے اور ہفتے کو موسلادھاربارش کا امکان ہے ، جس کے باعث اربن فلڈنگ کا خدشہ ہے۔
تفصیلات کے مطابق شہر قائد میں مون سون پھر ہلچل مچانے آ رہا ہے، محکمہ موسمیات نے کراچی اور حیدرآباد میں جمعہ، ہفتے کو موسلادھاربارش کی پیش گوئی کردی ہے اور کہا تیز بارش کے باعث اربن فلڈنگ کا خدشہ ہے۔
محکمہ موسمیات کا کہنا ہے کہ جمعرات کی شام یا رات خلیج بنگال سےہوا کا کم دباؤسندھ میں داخل ہونےکاامکان ہے ، سندھ، جنوبی پنجاب،مشرقی بلوچستان میں مون سون ہوائیں داخل ہوں گی۔
دوسری جانب آج کے ملک کے بعض حصوں میں بارش کی توقع ہے جبکہ دیگر علاقوں میں موسم گرم اور مرطوب رہنے کا امکان ہے، محکمہ موسمیات کے مطابق خیبرپختونخوا کے بالائی علاقوں سوات دیرمردان میں بارش ک امکان ہے ، پنجاب کے شہروں لاہور شیخو پورہ میں بھی بارش ہو سکتی ہے جبکہ گلگت بلتستان،کشمیراورملحقہ پہاڑی علاقوں میں تیزہواؤں اورگرج چمک کے ساتھ بارش کی توقع ہے۔
خیال رہے کراچی میں رواں ماہ بارش کے تین اسپیل آئیں گے ، جس سے شہر میں چھ اگست سے 24 اگست تک مون سون بارشوں کا امکان ہے، بارش برسانے والا پہلا سسٹم چھ اگست کو شہر میں داخل ہوگا ، جس کے باعث سات سے نو اگست تک بارش متوقع ہے جبکہ دوسرا اسپیل پندرہ تاریخ سے آئے گا اور چوبیس اگست سے بارش کے تیسرے اسپیل کا امکان ہے۔
یاد رہے وزیراعظم کی ہدایت پر این ڈی ایم اے آج سے شہر کے تین بڑے نالوں کی صفائی کا آغاز کردیا ہے تاکہ شہریوں کو مشکلات سے بچایا جاسکے۔
