انٹرنیشنل کرکٹ کونسل(آئی سی سی) نے نئی ٹیسٹ پلیئرز رینکنگ جاری کردی۔
انٹرنیشنل کرکٹ کونسل(آئی سی سی) کی جانب سے جاری کردہ نئی ٹیسٹ پلیئرز رینکنگ کے مطابق بلے بازوں کی فہرست میں نیوزی لینڈ کے کین ولیمسن کی پہلی اور آسٹریلیا کے اسٹیو اسمتھ کی دوسری پوزیشن برقرار ہے۔
آسٹریلیا کے مارنس لبوشین ایک درجہ ترقی پاکر تیسری پوزیشن پر پہنچ گئے جبکہ بھارتی کپتان ویرات کوہلی ایک درجہ تنزلی سے چوتھی پوزیشن پر چلے گئے۔
انگلینڈ کے جوروٹ چھ درجہ ترقی کے ساتھ پانچویں نمبر پر آ گئے ۔پاکستان کے بابر اعظم ایک درجہ تنزلی کے ساتھ چھٹے نمبر پر چلے گئے۔
بالرز کی رینکنگ میں آسٹریلیا کے پیٹ کمنز، انگلینڈ کے اسٹورٹ براڈ اور نیوزی لینڈ کے نیل ویگنر بدستور بالترتیب پہلی، دوسری اور تیسری پوزیشن پر موجود ہیں۔
ٹاپ ٹین بالرز میں پاکستان کا کوئی کھلاڑی شامل نہیں ہے۔
آل راؤنڈرز میں انگلینڈ کے بین اسٹوکس کی پہلی پوزیشن برقرار ہے ۔
جیسن ہولڈر ایک درجہ ترقی پاکر دوسری پوزیشن پر آگئے ہیں جبکہ بھارت کے رویندرا جدیجا ایک درجہ تنزلی کے بعد تیسری پوزیشن پر چلے گئے ہیں۔
