اسلام آباد: وزیر اعظم کے سابق معاون خصوصی زلفی بخاری نے دورہ اسرائیل سے متعلق بیان پر بلاول بھٹو زرداری پر ہتک عزت کا دعوی کردیا ہے۔
ایکسپریس نیوز کے مطابق زلفی بخاری نے اپنے وکیل کے ذریعے پیپلز پارٹی کے چیئرمین بلاول بھٹو زرداری کو ہتک عزت کا قانونی نوٹس بھجوایا ہے، جس میں انہوں نے دورہ اسرائیل سے متعلق خبروں پر بیان دینے پر بلاول بھٹو زرداری کو 100 ملین پاؤنڈ کا ہتک عزت کا دعویٰ کردیا۔
اپنی ٹوئٹ میں زلفی بخاری نے کہا کہ بلاول بھٹو زرداری ناسمجھی کے باعث وہ سب بول جاتے ہیں جو انہیں بتایا جائے۔ انہوں نے حال ہی میں میرے خلاف غیر ذمہ دارانہ بیان دیا ہے۔ جس پر انہوں نے اپنے قانونی ماہرین سے مشاورت کے بعد نوٹس نھیجنے کا فیصلہ کیا۔
واضح رہے کہ بلاول بھٹو زرداری نے زلفی بخاری کے دورہ اسرائیل کی خبروں پر کہا تھا کہ حکومت زلفی بخاری کے مبینہ دورہ اسرائیل کی تفصیلات سامنے لائے۔
نوٹس کا پس منظر
چند روز قبل اسرائیلی اخبار میں دعویٰ کیا گیا تھا کہ نومبر 2020 میں پاکستانی وزیراعظم کے معاون خصوصی زلفی بخاری نے اسرائیل کا دورہ کیا تھا۔ وہ لندن سے بذریعہ اسرائیل پہنچے تھے اور تل ابیب میں انہوں نے اسرائیلی وزارت خارجہ کے عہدیداروں سے ملاقات کرکے انہیں پاکستانی حکام کا پیغام پہنچایا تھا۔ اسی خبر کو ایک نیوز ویب سائیٹ ’مڈل ایسٹ مانیٹر‘ نے بھی شائع کیا تھا۔
غلط خبر شائع کرنے پر زلفی بخاری نے “مڈل ایسٹ مانیٹر ” کو بھی قانونی نوٹس بھیجا تھا، جس پر ویب سائٹ نے معافی مانگی تھی۔
