وزیراعلیٰ پنجاب کی معاون خصوصی ڈاکٹر فردوس عاشق اعوان نے کہا کہ کشمیریوں نے بہادر اور جرات مند لیڈر وزیراعظم عمران خان کو اپنا سفیر بنایا ہے۔
تفصیلات کے مطابق وزیراعلیٰ پنجاب کی معاون خصوصی ڈاکٹر فردوس عاشق اعوان نے مریم نواز کے بیان پر ردعمل دیتے ہوئے کہا کہ جعلی راجکماری جان لے بُزدل وہ ہے جو قوم کا پیسہ لوٹ کر لندن میں بیٹھا عیاشی کر رہا ہے، ایسا وزیراعظم جو طاقتور ممالک کی آنکھوں میں آنکھیں ڈال کر بات کر رہا ہے۔
انہوں نے کہا کہ ظل سبحانی نے بھیگی بلی بن کر حکومت اور ملک و قوم کا مذاق اڑوایا ہے، کشمیری نواز شریف کی دوغلی اور منافقانہ پالیسیوں سے کئی بار ڈس چکے ہیں اب مزید خود کو نہیں ڈسوا سکتے۔
فردوس عاشق اعوان نے کہا کہ جعلی راجکماری الفاظ کی حساسیت اور ملکی سلامتی سے ناآشنا ہے، جعلی شہزادی کے ہاتھ میں ماچس آگئی ہے جس سے وہ ہر طرف آگ بڑھکا رہی ہے، جعلی راجکماری کا پہلا وار ن لیگ پر پڑا، جس سے م لیگ اور ش لیگ برآمد ہوئی۔
وزیراعلیٰ پنجاب کی معاون خصوصی ڈاکٹر فردوس عاشق اعوان نے مزید کہا کہ گلگت میں بھی جعلی راجکماری مقبولیت کا دعویٰ اور بڑھکیں مارتی تھی، گلگت میں عبرتناک شکست کے بعد جعلی راجکماری کو کشمیر الیکشن میں بھی شکست کا مزہ چکھائیں گے۔
