ترجمان ن لیگ مریم اورنگزیب نے دعویٰ کیا ہے کہ پولیس نے عطا تارڑ سمیت ن لیگ کے کئی رہنماؤں کو گرفتار کرلیا
مریم اورنگزیب نے بتایا کہ علی پور چٹھہ پولیس اسٹیشن نے لیگی کارکنان کو گرفتار کیا ہوا تھا جنہیں چھڑانے کے لیے عطا تارڑ شام سے وہاں موجود تھے۔
انہوں نے کہا کہ ہمیں یہ اطلاع ملی ہے کہ انہیں بھی گرفتار کرلیا گیا ہے۔ مطالبہ کرتی ہوں کہ انہیں فوری طور پر رہا کیا جائے اور باقی کارکنان کو بھی چھوڑا جائے۔
واقعے پر وزیراعظم کے معاون خصوصی شہباز گل کا کہنا تھا کہ انکی پولیس سے بات ہوئی جس پر معلوم ہوا کہ یہ صبح سے پولیس کو دھمکیاں دے رہے تھے۔ ویڈیو میں بھی دیکھا گیا کہ عطا تارڑ باوردی پولیس اہلکاروں پر ہاتھ ڈال رہے ہیں۔
انہوں نے کہا کہ اگر کوئی پولیس کی وردی پر ہاتھ ڈالے گا تو پولیس گرفتار ہی کرے گی۔ ہم ن لیگ کی طرح نہیں اور نہ مخالفین کو گولیاں مارتے ہیں۔
