لاہور (خبر نگار خصوصی ) مسلم لیگ ن کے صدر شہباز شریف پی ڈی ایم کے سربراہی اجلاس میں شرکت کے لیے آج لاہور سے اسلام آباد روانہ ہوں گے ۔ شہباز شریف نے لیگی رہنماؤں سے مشاورت کی جس میں شہباز شریف کو اجلاس کے حوالے سے تجاویز سے آگاہ کر دیا گیا ۔ ذرائع کے مطابق شہباز شریف نے سینئرپارٹی رہنماؤں کی تجاویز سے اتفاق کیا۔ شہباز شریف نے پارٹی قائد نواز شریف سے اجلا س کے حوالے سے رابطہ کیا جس میں شہباز شریف نے پارٹی قائد سے پی ڈی ایم کے اجلاس کے لیے مشاورت کی۔
دونوں رہنماؤں نے حکومت کے خلاف تحریک کو تیز کرنے اور پی ڈی ایم کو متحرک کرنے پر اتفاق کیا ۔پارٹی قائد نے شہباز شریف کو پارٹی کی سطح پر بھی لیگی رہنماؤں کو متحرک کرنے کی ہدایت کر دی ۔ شہباز شریف نے سندھ ن لیگ کے اجلاس میں بھی لیگی رہنمائوں کو متحرک ہونے کی ہدایات دیں ، انھوں نے کہا کہ حکومتی کارکردگی، مہنگائی، معیشت اور لوڈشیڈنگ کے مسائل کو اجاگر کریں۔ ذرائع کے مطابق پی ڈی ایم کے اجلاس سے قبل شہباز شریف ن لیگ کے رہنمائوں کا اجلاس بھی بلائیں گے ۔
