پنجاب میں ایمرجنسی بٹن دبائیں ….پولیس حاضر….نیا ”لالی پاپ“

لاہور (خصوصی رپورٹ) پنجاب حکومت کا ایک اور انقلابی قدم خواتین کے تحفظ کیلئے موبائل فون کی خصوصی ایپ سروس کا آغاز کر دیا۔ خواتین کسی بھی ایمرجنسی کی صورت میں اپنے موبائل فون سے ویمن سیفٹی ایپ کا ابھی بٹن ہی دبائیں گی تو پولیس مدد کیلئے اس لوکیشن پر پہنچ جائے گی۔ سینئر ممبر اسپیشل مانیٹرنگ یونٹ وزیراعلیٰ پنجاب سلمان صوفی کاکہنا ہے کہ خواتین کا تحفظ سب سے مقدم ہے، پنجاب حکومت نے ویمن سیفٹی ایپ سروس شروع کر دی۔ انہوں نے بتایا کہ خواتین اب اپنے موبائل فون پر ویمن سیفٹی ایپ ڈاﺅن لوڈ کریں گی، گھریلو تشدد کا سامنا ہو یا کسی دفتر یا مارکیٹ میں کوئی خطرہ خواتین ویمن سیفٹی ایپ کا بٹن دبائیں گی، پولیس فوری ان کی مدد کو پہنچ جائے گی۔ پنجاب کمیشن برائے خواتین کی چیئرپرسن فوزیہ وقار کا کہنا تھا کہ وزیر اعلیٰ شہباز شریف کی ہدایت پر صوبے میں خواتین کے تحفظ کیلئے انقلابی اقدامات کئے جا رہے ہیں۔ سلمان صوفی نے بتایا کہ جیسے ہی کوئی خاتون سیفٹی ایپ کا بٹن دبائے گی، سیف سٹی کنٹرول روم میں اس جگہ کی نشاندہی ہو جائے گی۔