بدعنوانی کے خاتمہ کیلئے نیب نےموثرحکمت عملی وضع کی، موجودہ انتظامیہ کے دور میں نیب نےاب تک 535 ارب روپے کی ریکورکئے۔جسٹس جاویداقبال

اسلام آباد۔(اے پی پی):قومی احتساب بیوروکے چئیرمین جسٹس جاویداقبال نے کہاہے کہ بدعنوانی کے خاتمہ کیلئے نیب نےموثرحکمت عملی وضع کی جس کے نتیجہ میں موجودہ انتظامیہ کے دورمیں اب تک 535 ارب روپے ریکور کئے ۔ انہوں نے کہاکہ گیلانی اینڈگیلپ کے سروے میں 59 فیصد پاکستانی عوام نے نیب پراعتمادکااظہارکیاہے جس سے یہ بات ثابت ہوتی ہے کہ قومی احتساب بیورو قانون کے مطابق نیب بلاتفریق احتساب کاعمل جاری رکھے ہوئے ہے۔بدعنوانی کے خاتمہ کیلئے فعال حکمت عملی کی وجہ سے سزاوں کی مجموعی شرح 66 فیصد ہے جو دنیا بھرمیں وائیٹ کالرجرا ئم کی تحقیقات میں اہم کامیابی ہے۔ دنیابھرمیں موقر اداروں جیسے ٹرانسپیرنسی انٹرنیشنل، عالمی اقتصادی فورم ، گلوبل پیس کینیڈا، پلڈاٹ اورمشال پاکستان نے بدعنوانی کے خاتمہ کیلئے نیب کے مثالی کوششوں کو سراہاہے۔  چیئرمین  نیب نے کہاکہ قومی احتساب بیورو کسی دھمکی اورتنقید کے باوجود اپنی قانونی ذمہ داریاں اداکرے  گا ۔نیب کی انتظامیہ قانون کے مطابق انکوائریز اورتحقیقات کاعمل جاری رکھیں گی۔چئیرمین نیب نے کہاکہ نیب نے بدعنوانی کی تمام صورتوں اورمظاہرکو ختم کرنے کا تہیہ کررکھا ہے، نیب نے بالخصوص بدعنوانی، منی لانڈرنگ، عوام الناس سے دھوکہ دہی، جان بوجھ کربینک ڈیفالٹ ہونے، اختیارات کے غلط استعمال اورریاسی فنڈز پرخرد برد پراپنی توجہ مرکوز کی ہے۔ انہوں نے کہاکہ کرپشن کے خاتمہ اوربدعنوان لوگوں سے لوٹی ہوئی رقوم کی واپسی نیب کی اولین ترجیح ہے،ملک کوکرپشن سے پاک کرنے کیلئے کرپشن کے خلاف جدوجہد ہمارا عزم ہے۔ جسٹس جاوید اقبال نے کہاکہ اقوام متحدہ کے کنونشن برائے انسداد بدعنوانی (یواین سی اے سی) کے تحت نیب پاکستان میں فوکل ادارہ ہے،پاکستان اس کنونشن کی توثیق اوراس پردستخط کرچکاہے۔ انہوں نے کہاکہ پاکستان دنیا میں واحد ملک ہے جس نے کرپشن کے خاتمہ کیلئے چین سے مفاہمت کی دستاویز پردستخط کئے ہیں جبکہ نیب سارک اینٹی کرپشن فورم کا چئیرمین بھی ہے، نیب سارک ممالک میں رول ماڈل ادارے کی حیثیت رکھتاہے۔انہوں نے کہاکہ گزشتہ تین برسوں میں نیب کے علاقائی بیوروز کی کارگردگی مثالی رہی ہے۔ نیب کی موجودہ انتظامیہ کے دورمیں اکتوبر2017 سے لیکرجون 2021 تک کی مدت میں 535 ارب روپے ریکورکرکے قومی خزانہ میں جمع کئے گئے، نیب نے کل 179 میگا کرپشن کے کیسز میں 93 کیسز فائل کئے۔ یہ کیسز مختلف احتساب عدالتوں میں چل رہے ہیں ۔ 10 کیسز انکوائری کے مرحلہ میں ہیں۔ اسی طرح کئی میگا کیسز میں تحقیقات ہورہی ہے۔چئیرمین نے کہاکہ میگاکرپشن کے کیسوں کومنطقی انجام تک پہنچانا ہماری اولین ترجیح ہے۔ 179 میگا کرپشن کیسز میں 66 کیسز کوقانون کے مطابق نمٹایا گیا،ملک بھرمیں 1273 نیب کے ریفرنس مختلف احتساب عدالتوں میں زیرسماعت ہیں جن میں 1300 ارب روپے کی مبینہ خورد برد ہوئی ہے۔