ننکانہ صاحب (تحصیل رپورٹر) سکھوں کے روحانی پیشوا بابا گرو نانک کے 552 ویں جنم دن کی تقریبات جاری ، بھارت, انگلینڈ،کینڈا بنگلہ دیش سمیت دیگر ممالک سے آئے سکھ یاتریوں نے گوردوارہ سچا سودا میں اپنی مذہبی رسومات ادا کیں۔ بابا گرو نانک کے جنم دن کی تقریبات میں شرکت کے لیے آئے سکھ یاتریوں کو ننکانہ صاحب سے خصوصی بسوں کے زریعے شیخوپورہ کے گوردوارہ سچا سودا لایا گیا۔ جہاں انہوں نے اپنی مذہبی رسومات ادا کیں۔گوردوارہ سچا سودا شیخوپورہ میں سکھ یاتری پاکستانی حکومت کے جانب سے کیے جانے والے انتظامات پر خوشی سے نہال نظر آئے۔ بابا گرو نانک کے جنم دن کی تقریبات میں شرکت کے لیے بھارت سمیت دیگر ممالک سے آئے سکھ یاتریوں کا ڈپٹی کمشنر شیخوپورہ رانا شکیل اسلم نے استقبال کیا اور سکھ برادری کو ان کے مذہبی پیشوا کے جنم دن پر مبارکباد دی۔ ڈپٹی کمشنر رانا شکیل اسلم نے اس موقع پر بات چیت کرتے ہوئے کہا کہ حکومت پاکستان کی ہدایت پر گوردوارہ میں میڈیکل کیمپ اور لنگر کے بہترین انتظامات کیے گئے۔ سکھ یاتریوں کو وی آی پی مہمانوں کا درجہ دیا گیا ہے اور ان کے لئے سیکیورٹی کے بھی بہترین اور فول پروف انتظامات کئے گئے ہیں۔وفاقی وزیر مذہبی امور پیر نور الحق قادری نے کہا ہے کہ پاکستان دنیا بھر کے سکھوں کے لئے محبت اور احترام رکھتا ہے، پاکستان میں تمام مذاہب کے پیروکاروں کے لئے اپنی مذہبی رسومات کی ادائیگی کے لئے مکمل آزادی ہے، کرتار پور راہداری منصوبے کا مقصد محبت اور مساوات کو فروغ دینا اور مذہبی امتیازات کے خاتمے کا پیغام دینا تھا، ہم نے ہمیشہ تمام مذاہب کے لئے فراغ دلی کا مظاہرہ کیا ہے، ہمارے پڑوس میں جو کچھ ہورہا ہے وہ سب کے سامنے ہے، ایک سال سے سکھ برادری اپنے جائز مطالبات کی بات کررہی ہے ،مودی سرکار طاقت سے دبانے کی کوشش کررہی ہے۔
Sikh devotees gather around a bus carrying the Guru Granth Sahib (Sikh holy book) during a religious procession on the occasion of the birth anniversary of Guru Nanak Dev, the founder of Sikhism, in Nankana Sahib on November 19, 2021. (Photo by Aamir QURESHI / AFP)
