برسلز: (ویب ڈیسک) مغربی ممالک کی جانب سے روس پر مزید پابندیاں عائد کردی گئی ہیں اور یورپی یونین نے روس کے 7 بینکوں کو سوئفٹ بینکنگ نیٹ ورک سے نکال دیا ہے جن میں روس کا دوسرا بڑا بینک "وی ٹی بی بینک ” بھی شامل ہے، ماسکو سے تیل اور گیس کی خریداری کے لئے یورپی یونین نے روس کے دوبینکوں کو سوئفٹ سسٹم میں برقرار رکھا ہے۔
غیر ملکی میڈیا رپورٹس کے مطابق یورپی ممالک کے بلاک نے روس کے سرکاری میڈیا کی نشریات بند کردی ہیں جبکہ برطانوی وزیر اعظم نے اقوام متحدہ کے رکن ممالک سے مطالبہ کیا ہے کہ پیوٹن پر یوکرین سے افواج نکالنے کے لئے زور دیں۔
دوسری جانب متحدہ عرب امارات نے یوکرینی شہریوں کے لئے ویزہ فری انٹری ختم کردی ہے جس کے بعد یواے ای آنے کے خواہشمند یوکرینی شہریوں کو پہلے ویزہ لینا ہوگا۔
ادھرعالمی ادارہ برائے مہاجرین کا کہنا ہے کہ یوکرین سے لوگوں کی بڑے پیمانے پر ہجرت جاری ہے، اب تک 8 لاکھ 36 ہزار افراد یوکرین سے باہر نقل مکانی کرچکےہیں اور پولینڈ میں 4 لاکھ 50 ہزار سے زائد مہاجرین موجود ہیں۔
یورپی یونین نے روس کے 7 بینکوں کو سوئفٹ بینکنگ نیٹ ورک سے نکال دیا
