یوکرین میں جنگ کا عالمی معیشت پر گہرا اثر پڑے گا، آئی ایم ایف

واشنگٹن: (ویب ڈیسک) بین الاقوامی مالیاتی فنڈ (آئی ایم ایف) نے کہا کہ وہ یوکرین کی ہنگامی مالی اعانت کے لیے ایک ارب 40 کروڑ ڈالر کی درخواست کو آئندہ ہفتے کے اوائل میں منظوری کے لیے اپنے بورڈ میں لائے گا اور ہمسایہ ملک مالڈووا میں حکام کے ساتھ فنڈنگ ​​کے اختیارات کے بارے میں بات چیت کا سلسلہ بھی جاری ہے۔
ایک بیان میں آئی ایم ایف نے کہا کہ یوکرین میں جنگ کے باعث توانائی اور اناج کی قیمتوں میں مزید اضافہ ہوا ہے، جنگ کی وجہ سے 10 لاکھ پناہ گزینوں پڑوسی ممالک پہنچ چکے ہیں جبکہ روس پر متعدد اقتصادی پابندیاں عائد کی جا چکی ہیں۔
آئی ایم ایف نے منیجنگ ڈائریکٹر کرسٹالینا جارجیوا کی زیرصدارت بورڈ میٹنگ کے بعد ایک بیان میں کہا کہ صورتحال انتہائی ناگفتہ بہ ہے اور آؤٹ لک غیر معمولی غیر یقینی صورتحال کا شکار ہے، معاشی نتائج پہلے ہی بہت سنگین ہیں۔
انہوں نے کہا کہ جاری جنگ اور اس سے منسلک پابندیوں کا عالمی معیشت پر بھی شدید اثر پڑے گا۔ انہوں نے خبردار کیا کہ یہ بحران مہنگائی اور معاشی سرگرمیوں کو ایک ایسے وقت میں منفی جھٹکا دے رہا ہے جب قیمتوں کا دباؤ پہلے ہی زیادہ تھا۔
اس میں کہا گیا کہ قیمتوں میں اضافے کے جھٹکے دنیا بھر میں محسوس کیے جائیں گے اور حکام کو غریب گھرانوں کے لیے مالی امداد فراہم کرنی چاہیے جن کے لیے خوراک اور ایندھن کے اخراجات کا زیادہ حصہ ہوتا ہے اور مزید یہ کہا کہ اگر جنگ بڑھی تو معاشی نقصان بڑھ جائے گا۔