لاہور: (ویب ڈیسک) وزیراعظم شہباز شریف کے حکم پر آٹا سستا کر دیا گیا۔ پنجاب بھر میں ہر مقام پر 10 کلو آٹے کا تھیلا 450 روپے میں فروخت ہوگا۔
بزدار حکومت نے صرف رمضان بازاروں کیلئے سستا آٹا پیکج دیا تھا جبکہ شہباز حکومت نے تمام صوبے میں یکساں نظام لاگو کر دیا۔ فلور ملز 20 کلو پیکنگ میں آٹا تیار نہیں کریں گی۔ صرف 10 کلو سبز تھیلا کی پیکنگ سپلائی ہوگی۔ فلور ملز جمعرات سے آٹا سپلائی شروع کریں گی۔ قبل ازیں صرف رمضان بازار میں 450 روپے میں آٹا دستیاب تھا۔
محکمہ خوراک فلورملز کو 1600 روپے فی من قیمت پر گندم فراہم کرے گا۔ ایک بوری گندم میں سے 8 تھیلے آٹا تیار کرنا ہوگا۔ رمضان المبارک کے اختتام تک اوپن مارکیٹ اور رمضان بازاروں میں سستا آٹا فروخت ہوگا، عید سے قبل سکیم ختم ہوجائے گی۔ فلور ملز ایسوسی ایشن کے گروپ لیڈر عاصم رضا اور چئیرمن ملک طاہر کی جانب سے سکیم کا خیر مقدم کیا گیا۔
وزیراعظم کے حکم پر آٹا سستا، 10 کلو آٹے کا تھیلا 450 روپے میں فروخت ہوگا
