تحریک انصاف کے پلان بی کے خلاف الیکشن کمشن نے حکم نامہ جاری کردیا۔ آر اوز کو پی ٹی آئی امیدواروں سے پی ٹی آئی نظریاتی کے ٹکٹ قبول نہ کرنے کی ہدایت جاری کردی گئی۔ دوسری جانب سوشل میڈیا پر دعوے کیے جا رہے ہیں کہ پی ٹی آئی امیدواروں سے نظریاتی گروپ کی ٹکٹیں چھینی جا رہی ہیں۔
پی ٹی آئی نے پلان بی کے تحت اپنے امیدواروں کو پاکستان تحریک انصاف نظریاتی سے ٹکٹ جاری کیے ہیں جنہیں جمع کرانے کا سلسلہ ہفتہ کو شروع کیا گیا۔
اس پر الیکشن کمیشن نے حکم جاری کیا کہ الیکشن کمیشن کودھوکا دیکرقانون کی خلاف ورزی کی جارہی ہے آراوزایسے کسی امیدوار کو دوسرا انتخابی نشان نہ دیں۔
الیکشن کمیشن نے حکم جاری کیا کہ اکثرامیدواروں کی جانب سے درخواستیں موصول ہوئی ہیں جن میں الیکشن کمیشن کودھوکا دیا جارہا ہے اور قانون کی خلاف ورزی کی جارہی ہے۔
حکم نامے میں کہا گیاکہ کوئی انتخابی نشان کسی دوسرے پارٹی کے امیدوارکونہ دیاجائےجوامیدوار کسی اورجماعت کا ممبرہواوردوسری جماعت کا نشان مانگے وہ نہ دیاجائے آراوزایسے کسی امیدوار کو دوسرا انتخابی نشان نہ دیں، الیکشن ایکٹ کے تحت امیدوار اپنی پارٹی وابستگی کا سرٹیفکیٹ دیتا ہے ایک شخص ایک وقت میں ایک سے زیادہ پارٹی کا رکن نہیں ہوسکتا۔
تحریک انصاف نے تمام قومی وصوبائی امیدواروں کوپاکستان تحریک انصاف نظریاتی کے ٹکٹس جاری کیے ۔ پی ٹی آئی کیجانب سے جاری اعلامیے میں ہدایت کی گئی کہ تمام امیدواران تحریک انصاف نظریاتی کے ٹکٹس آراوزاورڈی آروزکے دفاترمیں جمع کرائیں۔
دریں اثنا سوشل میڈیا پر پی ٹی آئی کے حامیوں کی جانب سے دعوے کیے گئے ہیں کہ پی ٹی آئی امیداروں سے نظریاتی گروپ کی ٹکٹیں چھینی جا رہی ہیں۔
پی ٹی آئی کے آفیشل ٹوئٹر ہینڈل سے اس دعوے کو ری ٹوئیٹ کیا گیا کہ ”پی ٹی آئی کے امیدواروں سے پی ٹی آئی نظریاتی کی ٹکٹیں چھیننے کی خبریں آرہی ہیں،بشارت راجہ کی ٹکٹ چھین کر نامعلوم شخص بھاگ گیا۔“
