پاکستان کرکٹ بورڈ (پی سی بی) کی جانب سے اسکائی اسپورٹس کے خلاف شکایت پر سابق آسٹریلوی کرکٹر عثمان خواجہ نے طنزیہ ردعمل دیتے ہوئے کہا ہے کہ ’’یہ ضرور کوئی مذاق ہوگا‘‘۔
یہ معاملہ انگلینڈ اور پاکستان کے درمیان لارڈز میں جاری دوسرے ٹیسٹ کے پہلے روز اس وقت سامنے آیا جب اسکائی اسپورٹس نے لنچ بریک کے دوران سابق پاکستانی کپتان اور وزیراعظم عمران خان کے صاحبزادوں سلیمان خان اور قاسم خان کا انٹرویو نشر کیا۔
انٹرویو سابق انگلش کپتان اور اسکائی اسپورٹس کے کمنٹیٹر مائیکل ایتھرٹن نے کیا۔ گفتگو کے دوران عمران خان کے بیٹوں نے اپنے والد کی صحت اور جیل میں موجود حالات کے حوالے سے تشویش کا اظہار کیا۔
رپورٹس کے مطابق پی سی بی نے انٹرویو میں شامل سیاسی نوعیت کے مواد پر اسکائی اسپورٹس سے باضابطہ شکایت کی۔ یہ بھی اطلاعات سامنے آئیں کہ پاکستان ٹیم نے شکایت کے باعث لنچ کے بعد میدان میں واپس نہ آنے پر غور کیا، تاہم بعد ازاں معاملہ حل ہوگیا اور قومی ٹیم دوسرے سیشن کے لیے میدان میں واپس آگئی۔
پی سی بی کی شکایت پر ردعمل دیتے ہوئے عثمان خواجہ نے سوشل میڈیا پر طنزیہ انداز اختیار کیا اور کہا کہ ’’یہ ضرور کوئی مذاق ہوگا‘‘۔ ان کے بیان نے سوشل میڈیا پر نئی بحث چھیڑ دی ہے۔
لارڈز ٹیسٹ کے دوران پیش آنے والے اس واقعے نے کھیلوں کی نشریات میں سیاسی معاملات اور کھلاڑیوں سے متعلق حساس موضوعات کی کوریج کے حوالے سے بھی سوالات اٹھا دیے ہیں۔
دوسری جانب پاکستان اور انگلینڈ کے درمیان ٹیسٹ میچ میں کرکٹ پر توجہ برقرار ہے، جبکہ پی سی بی اور اسکائی اسپورٹس کے درمیان پیدا ہونے والا تنازع اب ختم ہونے کی اطلاعات ہیں۔
