پاکستانی اداکارہ ماہرہ خان طویل عرصے بعد ٹی وی اسکرین پر واپسی کے لیے تیار ہیں، جہاں وہ اداکار وہاج علی کے ساتھ ڈرامہ سیریل ’مٹی دے باوے‘ میں پہلی بار مرکزی کردار میں نظر آئیں گی۔ ڈرامے کا ٹریلر حال ہی میں جاری کیا گیا ہے، جس کے بعد شائقین میں اس پروجیکٹ کو لے کر خاصا جوش پایا جا رہا ہے۔
’مٹی دے باوے‘ گرین انٹرٹینمنٹ کی پیشکش ہے، جس کی کہانی فائزہ افتخار نے لکھی ہے جبکہ ہدایت کاری سید وجاہت حسین نے کی ہے۔ پروجیکٹ کو تحریم چوہدری پروڈیوس کر رہی ہیں۔
ڈرامے میں ماہرہ خان بِلو/بلقیس بانو جبکہ وہاج علی بالا کے کردار میں دکھائی دیں گے۔ کہانی کا پس منظر پنجاب کے مختلف ادوار سے جڑا ہوا ہے اور ٹریلر میں دونوں کرداروں کی محبت، جدائی، تنازع اور دوبارہ ملاقات کو نمایاں کیا گیا ہے۔
ٹریلر کے مطابق ماہرہ خان کا کردار ابتدا میں ایک نوجوان لڑکی کے طور پر سامنے آتا ہے، تاہم وقت گزرنے کے ساتھ اس کی شخصیت میں بڑی تبدیلی آتی ہے۔ دوسری جانب بالا جیل جانے کے بعد ایک بدلے ہوئے اور سخت مزاج شخص کے طور پر واپس آتا ہے، جس کے بعد دونوں کے درمیان پرانی محبت کے بجائے کشیدگی اور تصادم دکھائی دیتا ہے۔
’مٹی دے باوے‘ کی سب سے بڑی خاص بات ماہرہ خان اور وہاج علی کی نئی آن اسکرین جوڑی ہے۔ دونوں اس سے قبل ایک کمرشل میں ایک ساتھ نظر آچکے ہیں، تاہم یہ ان کا پہلا مکمل ٹی وی ڈرامہ ہے۔
ڈرامے کے ٹریلر میں رومانس کے ساتھ ایکشن، روحانیت اور خاندانی ڈرامے کے عناصر بھی دکھائی دیتے ہیں، جبکہ اس کی سنیماٹک پیشکش اور دونوں مرکزی اداکاروں کی کیمسٹری نے ریلیز سے قبل ہی توجہ حاصل کرلی ہے۔
ماہرہ خان کی طویل عرصے بعد ٹی وی پر واپسی اور وہاج علی کے ساتھ پہلی بار مرکزی جوڑی نے ’مٹی دے باوے‘ کو 2026 کے انتہائی متوقع پاکستانی ڈراموں میں شامل کردیا ہے۔ تاہم یہ ڈرامہ ماضی کے مقبول ترین ڈراموں کے ریکارڈ توڑ پائے گا یا نہیں، اس کا فیصلہ اس کی نشریات اور ناظرین کے ردعمل کے بعد ہی ہوسکے گا۔
