سابق پاکستانی کرکٹر باسط علی نے بھی سابق کپتان اور 1992 ورلڈ کپ کے فاتح عمران خان کے لیے آواز بلند کردی ہے۔ جاوید میانداد اور معین خان کے بعد باسط علی کی جانب سے بھی عمران خان کو مناسب طبی سہولیات فراہم کرنے کا مطالبہ سامنے آیا ہے۔
سوشل میڈیا پر جاری اپنے ویڈیو پیغام میں باسط علی نے کہا کہ ان کی عمران خان کے ساتھ پرانی یادیں وابستہ ہیں۔ انہوں نے یاد دلایا کہ عمران خان پاکستان کے کپتان رہ چکے ہیں اور ان کی قیادت میں پاکستان نے 1992 کا ورلڈ کپ جیتا تھا۔
باسط علی کا کہنا تھا کہ عمران خان کی دنیا بھر میں عزت ہے اور ان کی، ان کے خاندان اور ساتھیوں کی خواہش ہے کہ عمران خان جہاں بھی ہوں خیریت سے رہیں۔
انہوں نے حکومت سے اپیل کرتے ہوئے کہا کہ اگر عمران خان کو علاج معالجے کی ضرورت ہے تو انہیں طبی سہولیات فراہم کی جانی چاہئیں۔ باسط علی نے اسے حکومت سے اپنی ذاتی درخواست بھی قرار دیا۔
اس سے قبل سابق وکٹ کیپر بلے باز معین خان نے بھی حکام سے عمران خان کو صحت کی سہولیات اور بنیادی حقوق فراہم کرنے کی اپیل کی تھی اور دیگر کرکٹرز سے بھی ان کے لیے آواز اٹھانے کا مطالبہ کیا تھا۔
اسی طرح لیجنڈری بلے باز جاوید میانداد نے بھی عمران خان کی صورتحال پر تشویش کا اظہار کرتے ہوئے حکام سے معاملہ بات چیت کے ذریعے حل کرنے کی اپیل کی تھی۔
