ایران کا اردن میں امریکی اڈے پر حملہ، کئی جنگی طیاروں کو نقصان
اردن میں قائم موافق السالتی ایئر بیس پر ایرانی میزائل حملے کے دوران متعدد امریکی فوجی طیاروں کو نقصان پہنچا ہے۔ امریکی حکام کے حوالے سے رپورٹ میں بتایا گیا کہ حملہ 8 ستمبر کی رات ہوا، جب ایران نے امریکی اہداف کو بیلسٹک میزائلوں سے نشانہ بنایا۔
رپورٹ کے مطابق تقریباً 8 امریکی F-15 لڑاکا طیاروں کو معمولی نقصان پہنچا، تاہم انہیں دوبارہ سروس میں شامل کر لیا گیا۔ ایک A-10 تھنڈر بولٹ بھی حملے کی زد میں آیا جس کا ایک وِنگ شدید متاثر ہوا۔
ذرائع کے مطابق امریکی افواج نے حملے سے بچاؤ کے لیے 30 سے زائد پیٹریاٹ میزائل بھی فائر کیے۔ اردن نے اس سے قبل بتایا تھا کہ ایرانی حملے کے دوران داغے گئے بیشتر میزائلوں کو فضائی دفاعی نظام نے روک لیا۔
یہ حملہ ایسے وقت میں ہوا جب امریکا نے ایران کے پانچ آئل ٹینکرز کو تباہ کیا تھا۔ واشنگٹن کے مطابق یہ کارروائی ایرانی پاسداران انقلاب کی جانب سے امریکی بحری جنگی جہاز کو نشانہ بنانے کے جواب میں کی گئی تھی۔ اس کے بعد ایران نے اردن میں امریکی اڈے سمیت خطے میں امریکی اہداف پر جوابی کارروائیاں کیں۔
رپورٹس کے مطابق حملے میں کسی امریکی فوجی کی ہلاکت کی اطلاع نہیں ملی، تاہم امریکی جنگی طیاروں کو پہنچنے والا نقصان خطے میں جاری امریکا ایران کشیدگی میں ایک اہم پیش رفت قرار دیا جا رہا ہے۔
