لاہور ہائیکورٹ: ججز کی تعطیلات سے متعلق نئی گائیڈ لائنز اور ایس او پیز جاری

لاہور (آئی این پی) چیف جسٹس لاہور ہائیکورٹ جسٹس عالیہ نیلم کے حکم پر ججز کی موسمِ گرما اور موسمِ سرما کی تعطیلات کیلئے پہلی مرتبہ نیا میکنزم تیار کر لیا گیا، لاہور ہائیکورٹ نے ججز کی تعطیلات سے متعلق نئی گائیڈ لائنز اور ایس او پیز جاری کر دیئے۔ نئی پالیسی کا مقصد تعطیلات کے دوران ججز کی دستیابی یقینی بنانا اور فوری و ہنگامی نوعیت کے مقدمات کی سماعت کا سلسلہ جاری رکھنا ہے۔ نئی گائیڈ لائنز کے تحت موسمِ گرما کی تعطیلات کے لئے ججز کو تین گروپس میں تقسیم کیا جائے گا جبکہ ہر گروپ میں ججز کی تعداد حتی الامکان برابر رکھی جائے گی اور سینئر و جونیئر ججز کا مناسب امتزاج یقینی بنایا جائے گا۔ چیف جسٹس لاہور ہائیکورٹ موسمِ گرما کیلئے تین تعطیلاتی گروپس تشکیل دیں گی، ججز کو تعطیلاتی گروپس اور ان کے دورانئے سے ہر سال جنوری کے اختتام تک آگاہ کیا جائے گا۔ تعطیلات کے دورانیے میں تبدیلی یا دوسرے جج سے گروپ تبدیل کرنے کی درخواست فروری کے اختتام تک دی جاسکے گی۔ یکم مارچ سے موسمِ گرما کے تعطیلاتی گروپس حتمی تصور ہوں گے جس کے بعد گروپ یا تعطیلات کے دورانیے میں تبدیلی صرف غیر معمولی حالات میں ممکن ہوگی، تعطیلاتی گروپ میں کسی بھی تبدیلی کیلئے چیف جسٹس لاہور ہائیکورٹ کی منظوری لازمی قرار دی گئی ہے۔