کراچی (این این آئی) جامعہ دارالعلوم کراچی و وفاق المدارس العربیہ پاکستان کے صدر مفتی اعظم پاکستان
شیخ الاسلام مفتی محمد تقی عثمانی نے کہا ہے کہ علمائے کرام اور آئمہ مساجد اپنی اپنی مساجد میں عوامی درس قرآن کا سلسلہ شروع کریں اور عوام کو قرآن کریم ترجمے کے ساتھ سمجھ کر پڑھنے کی ترغیب دیں۔وہ جامعہ دارالعلوم کراچی میں المدنی اسلامک اکیڈمی پاکستان کے زیر انتظام تحریک حقوق قرآن کے احیاء اور مساجد میں آسان ترجمة القرآن بطور ہدیہ رکھنے کے آغاز کی تقریب سے خطاب کر رہے تھے۔ تقریب میں کراچی کے مختلف مدارس کے علما اور آئمہ مساجد نے شرکت کی۔مفتی محمد تقی عثمانی نے کہا کہ اللہ تعالیٰ نے قرآن کریم کی صورت میں انسانیت کو ہدایات اور پیغام عطا کیا ہے، اس لیے مسلمانوں کو چاہیے کہ وہ تلاوت کے ساتھ قرآن کا ترجمہ سمجھنے کی بھی کوشش کریں۔ آئمہ مساجد جمعہ اور دیگر دینی اجتماعات میں تسلسل کے ساتھ عوام کی ذہن سازی کریں کہ قرآن کریم کو سمجھ کر پڑھا اور اس پر عمل کیا جائے۔
