مشتبہ فراڈ نمبرز کی شکایت اب موبائل ایپ سے درج ہوگی

کراچی(این این آئی)پاکستان ٹیلی کمیونیکیشن اتھارٹی (پی ٹی اے) نے ٹیلی کام صارفین کی شکایات کے بروقت ازالے اور نظام کو مزید مؤثر بنانے کے لیے کمپلینٹ مینجمنٹ سسٹم کو اپ گریڈ کرتے ہوئے نئی موبائل ایپ متعارف کرا دی۔پی
ٹی اے کے مطابق نئی ایپ کے ذریعے صارفین موبائل فون سے شکایات درج کرنے کے ساتھ ان کی پیش رفت اور موجودہ حیثیت بھی معلوم کرسکیں گے۔ ایپ اینڈرائیڈ اور آئی او ایس دونوں صارفین کے لیے دستیاب ہوگی۔اتھارٹی حکام نے کہا کہ نئی ایپ میں صارفین کی سہولت اور تحفظ کو خصوصی اہمیت دی گئی ہے، جبکہ او ٹی پی پر مبنی کثیر سطحی تصدیقی نظام بھی شامل کیا گیا ہے۔پی ٹی اے کے مطابق شکایات کی جانچ پڑتال کے عمل کو مزید بہتر بنانے کے ساتھ متعلقہ دستاویزات اپ لوڈ کرنے کا طریقہ بھی آسان کردیا گیا ہے۔کمپلینٹ مینجمنٹ سسٹم میں موبائل نمبرز سے متعلق مشتبہ فراڈ اور غیر معمولی سرگرمیوں کی اطلاع دینے کے لیے نیا ماڈیول بھی شامل کیا گیا ہے، جس کے ذریعے صارفین مشتبہ نمبرز کی شکایات براہ راست پی ٹی اے کو درج کراسکیں گے۔پی ٹی اے کے مطابق نئی ایپ کا مقصد شکایات کے اندراج اور ازالے کے عمل کو آسان، شفاف اور مؤثر بنانا اور ٹیلی کام خدمات سے متعلق شکایات کا بروقت حل یقینی بنانا ہے۔